Human sa piliay sa barangay

Samtang nagsulat ako niining lindog, wa kitay ideya pa unsa ang resulta sa piliay sa barangay ug sa Sangguniang Kabataan. Naghinamhinam gyud ko sa mga resulta labi na sa init kaayo nga bugno dinhi sa Syudad sa Sugbo.

Makadaog ba ang pundok nga nagsigig babag sa mga proyekto o kining naa sa nagduso sa maong mga proyekto?

Mahinungdanon man gud ang piliay karon kay human niini mao man sab ang piliay kon si kinsay mahimong presidente sa Association of Barangay Councils (ABC) ug sa SK Federation sa Syudad sa Sugbo.

Kon mayoriya ang mga kapitan ug SK chairman nga naa sa kampo sa Barug Team Rama, madugangan og usa pa ang mga konsehal sa Konseho sa Syudad sa Sugbo. Buot ipasabot, sila gihapon ang mahimong mayoriya.

Makapatuyang sila sa pagsige og babag na sa mga proyekto ni Mayor Tomas Osmeña.

Sa laing bahin, kon mayoriya ang mga kapitan ug SK chairman nga naa sa kampo sa BOPK, madugangan ang BOPK og duha ka boto samtang makuhaan ang Barug Team Rama og usa.

Kulbahinam kini kay mahimo bayang mobalhin pa og kampo ang mga mananaog sa piliay karon pabor sa lainlaing kampo.

Naa na karon sa mga kapitan ug mga SK chairman kon asa sila modapig.

Anha ba sila sa kampo sa naglingkod nga mayor nga si Mayor Tomas Osmeña aron makapaabot nga lakip ang iyang mga barangay nga unang makabenepisyo sa mga proyekto sa Syudad sa Sugbo?

O anha ba sila sa kampo sa bise mayor nga nitapon sa PDP-Laban ug sa kampo ni Presidential Assistant for Visayas Mike Dino.

Nakahibawo na man kita nga ang kampo ni Dino ug Labella maoy nagbabag sa Bus Rapid Transit (BRT), sa mga proyekto ni Kong. Raul del Mar sa first district, sa kalambuan sa Kawit, ug kadtong Sustainable Livelihood Project (SLP) sa DSWD alang sa mga kabus.

BRT

Kinsa may mas popular karon sa Syudad sa Sugbo?

Angayan diayng hinuktokan sa tanan kining survey nga gipahigayon sa Social Weather Station (SWS) diin moguwa nga mayoriya sa mga Sugboanon ningsuporta niining maong proyekto nga maoy labing dali nga solusyon sa grabing trapiko dinhi sa atong syudad.

Duha ka tuig na man gud nga nagsigig kampanya batok sa BRT ang kampo ni Mike Dino apan hangtod karon, wa man sila makakumbinser diay sa mayoriya sa mga Sugboanon.

Indikasyon kini kon asa padung ang hangin. Gani, sa usa ka forum sa pro-Duterte nga grupong Kilusang Pagbabago (KP), mas nikiling man sila pabor gani sa BRT kay makaayo kini sa mga kabus sama sa barato nga plete.