Once there was a promise

Six thirty in the morning miadto na ko sa polling precints aron pagbotar. Eleksiyon man gud ron sa Barangay ug SK. Wa madugay sa akong pag-abot nagsugod na ang pagpabotar sa mga botante.

Human ko makabotar, migawas dayon ko sa maong presinto. Unya nakahunong ko paglakaw dihang nakagawas na ko sa gate. Usa ka lalaki ang akong nasugatan nga nakahunong sab paglakaw dihang nakita ko niya. “Roxan?”

“Alfred?”

Nindot kaayo mig smile sa usag usa. Unya nag-aper mi. Three years na nga wa mi magkita kay pag-graduate namo sa haysikol, milarga man sila si Alfred sa Davao kay namalhin man silag puyo didto kay gihimo mang branch manager ang iyang Papa sa banko nga gitrabahoan ani.

“Sus, hapit wa ko makaila nimo, uy, Roxan. Porbida, misamot ka man ron kaguwapa.”

Nabatyagan ko kaayo ang pag-blush sa akong nawong. Apan kadali ra kay tinuod man sab ang iyang giingon. Ang mga suitors nako pulos midayeg sa akong hitsura.

“Salamat, ha. Ikaw sab, dako nag kausaban. Daot ka man kaniadto, uy, Alfred. Mora kag nagturugsoy nga kawayan.” Mikatawa ko. Nakapangawot sa ulo si Alfred. “Pero karon, sus, macho na kaayo. Miguwapo na.”

“Salamat sa pagdayeg, ha, Roxan.”

“Sige, Al, mopauli na ko. Mobotar ka pa ra ba.”

Bisag buntag pa apan sakit na ang kainit sa adlaw nga midapat sa akong panit. Midiretso ko sa pagpauli. Wa na ko mogawas sa balay. Diha ra ko sa sulod. Nagpahayahay ko sa among terrace. Mihigda ko sa folding bed ug nagbasag newspaper. Hilig ko ani kay Political Science man ang kurso nga akong gikuha. Maoy gusto nako nga di ko mauwahi sa mga current events.

Para nako, importante ni kay plano man nakong mo-proceed sa Law Course kon makahuman na ko sa Political Science. Sila si Mama ug Papa tua pa sa polling precints aron pagbotar. Wa ko mag-summer class. Gusto kong makapahuway gyud karon nga closing sa klase. Kon mabuntag adto ko magpalabay sa dagat. Maligo ko. Manghapas gyud kog lotion aron di ko magka-sunburn.

Unya nahunahuna ko si Alfred. Wa gyud ko magdahom nga magkakita mi karong adlawa. Nganong nia kaha siya karon sa among lungsod nga tua man siya sa Davao magpuyo ug mag-eskuwela?

(SUMPAYAN)