Damgo ni Sidoy
Nagtrokis sa mga linya ang papel nga gihatag sa usa ka tiguwang kaniya. Ang tiguwang mag-agian sa barbekyuhan ni Nang Sima kada recess period atol nga magkaon siyag minantikaang saging nga mag-alisngaw sa kainit. Palitan niya ang tiguwang og usa ka tuhog nga mapahiyumon nga modawat niini.
Iyang nahibaw-an nga herbolaryo ang tiguwang nga magsuroyan og lana nga gisulod og gagmayng mga botelya. Kausa nangutana siya sa tiguwang kon asa kini padung.
“Pugong sa pulso kining ako, Dong, kon naay mamalit maayo kaayo.” Gihiling niya ang buyot sa tiguwang; miaringkil ang binutilyang lana.
“Imo na ni, Dong, haplas para panuhot, maayo ni inighuman nimog duwag basketball.” Kadawaton siya dili, apan iyang gipugos.
Usahay, gunitan sa tiguwang ang iyang kamot aron basahon ang mga badlis sa palad. “Nia sa imong palad nga madato ka, ugma damlag.” Mipahiyom si Isidro sa panagna. “Manggiluy-on ka nga bata. Daghan kag mga higala tungod sa imong kinaiya.”
Nasuod niya ang tiguwang. Misaysay kini nga nakasunod
ERNESTO D. LARIOSA San Fernando, Cebu
sa kalaki sa iyang apuhan. Gibilin kuno kaniya ang tanang kahibawo sa iyang apuhan una pa kini mamatay. Wa siya maminyo ug kon gusto ni Sidoy iyang ibilin ang tanan niyang nahibaw-an isip herbolaryo sa ulitawo.
“Hasta sa pagtagna, Noy Isaac?” Iyang gipangutana.
“Tanan gayud, way mamisik. Dong, apan di lagi ka madato.”
“Ingon ka madato ko, ugma damlag.” Ni Sidoy.
“Mausab lagi ang dagan. Kay mausab man ang imong panlantaw.”
Mograduwar na siya sa senior high sunod tuig. Maoy gusto sa iyang maguwang nga si Pedoy nga mopadayon siya sa kolehiyo sa kursong enhinyero. Si Manoy niya Pedoy usa ka panday nga tua sa Saudi Arabia. Ang ilang giniknanan mga tiguwang na. Kugihan siyang magtuon monang siya ang nag-una sa ilang klase. Kon dawaton niya ang tanyag sa tiguwang di na siya makapadayon sa kolehiyo kay libang sa kalaki sa tiguwang.
Usa ka adlaw, iyang gisultian ang tiguwang sa umaabot nilang Field Trip sa Science Class ug sa iyang damgo sa itom nga alibangbang nga mibatog sa iyang abaga.. Mitutok ang tiguwang niya. Mihangad sa langit. May gikuhang bakanteng gamayng papel sa bulsa sa iyang gisiong polo shirt. Mihuwam sa ball pen ni Sidoy ug may gisuwat nga mga badlis.Unya, gihatag niya. “Hilnga ni sa tungang gabii, alas dose gyud, Dong!” matod ni Noy Isaac.
Wa siya matug. Pagka alas dose gyud sa iyang relo gitan-aw niya ang papel sa tiguwang. Misiga ang iyang mga mata. Nakita niya nga may bus nga nahagbong puno sa mga tinun-an diha sa papel. Wa siya makatug. Gisayo niya si Mr. Sayson, ang Science teacher nila ug gisultihan sa panagna. Mikatawa ang maestro.
“Di na mausab ang eskidyol, ayaw tuo anang tagna-tagna. We are now in the modern times.”
Wa mokuyog si Sidoy. Gituman niya ang tagna. Pagka gabii nadungog ang dakong balita. Nahagbong ang bus nga gisakyan sa nag-field trip sa Sapa-Sapa Senior High. Daghan ang nangamatay niyang mga klasmet. Mikurog si Sidoy. Nanibug-ok ang iyang mga luha. Nahibaw-an sad nga way maayong maintenance ang bus sa munisipyo. Niadtong higayuna dautan ang break. (KATAPUSAN)