Valenzuela gikuha sa Casino isip assistant coach
Gikuha sa Casino Active Cebu City Niños isip assistant coach ang kanhi magduduwa sa Philippine Basketball Association (PBA) nga si Junthy Valenzuela aron makatabang sa paggiya sa ilang puwersa sa umaabot nga 2nd season sa Maharlika Pilipinas Basketball League (MPBL).
Si Valenzuela, kinsa kanhi headcoach sa University of San Carlos (USC) Warriors sa Cebu Schools Athletic Foundation Inc. (CESAFI), maoy usa sa mga moabag kang headcoach Gilbert Castillo, kinsa usa sab ka ex-PBA.
Ang panagtambayayong nila ni Valenzuela ug Castillo gilauman nga makatabang og dako sa kampanya sa Niños gumikan sa taas nilang kasinatian sa PBA.
Mangulo sa kampanya sa Niños mao ang mga ex-PBA nga sila si Jondan Salvador, Cesar Catli ug Erick Rodriguez.
Ang ubang mga magduduwa sa Niños mao sila si kanhi UV Green Lancers University of the Visayas (UV) Green Lancers John Abad, Harold Cincoflores, Franz Arong, Alfred Codilla ug Raffy Octobre, kanhi University of San Carlos (USC) Warriors William McCalone, Enrico Llanto ug Ian Ortega.
Mikompleto sa ilang lineup mao sila si kanhi University of San Jose Recoletos (SUJ-R) Jaguars Iron Suano, Victor Nunez ug Kevin Villafranca, kanhi Southwestern University-Phinma (SWU) Cobrtas Bernie Bregondo ug Jun Luz, kanhi University of Cebu (UC) Webmaster Jr Puerto ug Mark Abadia, produkto sa Adamson Falcons.
Ang Casino gikatakdan mohimog tuneup games sulod ning semanaha.