BAG-ONG RULE SA MPBL GISAWAY

Giuwan og mga pagsaway sa social media ang Maharlika Pilipinas Basketball League (MPBL) gumikan sa implementasyon sa giingong “discriminatory rule” nga nag-limit sa 25 ka partisipanteng teams og tagsa lang ka Fil-Am nga magduduwa nga dili molapas sa 6’4” ang gitas-on.

Si MPBL commissioner Kenneth Duremdes mianunsyo ning bag-ong patakaran.

Gipasabot ni Duremdes nga ilaha kining gihimo aron ipabilin ang balanseng kompetisyon sa liga ug ipatuman ang ilang tinguha nga hatagan og prayoridad ang lokal nga mga magduduwa.

“Kasi kung papayagan natin yung malalaking Fil-foreign players, magkakaroon agad

ng disadvantage sa mga local players natin. We want to look at the best interest of the league, yung magkaroon ng balance competition,” matod ni Duremdes sa interbyu sa Foxsports.ph.

Migawas ang bag-ong lagda human ang expansion team nga Mandaluyong, kinsa giyahan ni coachMac Cuan, mingkuha og duha ka Fil-foreigners gikan sa Alab Pilipinas nga sila si Ray Parks Jr. ug Lawrence Domingo.

Apan alang sa ubang kanhi magduduwa sa Philippine Basketball Association (PBA) sama ni Rob Reyes, dili makatarunganon ang bag-ong lagda nga gipatuman ni Duremdes.

Pinaagi sa iyang Twitter account, gisaway ni Reyes ang bag-ong lagda nga ‘racist’ ug ‘illegal.’

Wala sab makauyon niini sila si kanhi Gilas Pilipinas

naturalized player Marcus Douthit ug Alaska Aces assistant coach Jeff Cariaso.

Apan bisan pa niini, gidepensaan ni Duremdes ang iyang desisyon.

“Kailangan isa lang kasi nga ang objective natin talaga is magkaroon ng opportunity ‘yung mga players natin, particularly our local players and homegrown,” asoy ni Duremdes.

“We don’t want to see bigger Filforegin players dominating our local players and homegrown.”

Ang PBA aduna sa’y lagda nga kamay-ong niini diin gilimitahan lang sa liga ang ilang matag miyembrong teams og lima ka Fil-foreigners. / ESL