CAVS GIKULATA SA GAME ONE

Milampos ang hosts Boston Celtics sa ilang misyon nga pugngan si LeBron “King” James nga maoy nagsilbe nilang agianan sa paglampornas sa Cleveland Cavaliers, 108-83, kagahapon sa Game 1 sa Eastern Conference finals series sa National Basketball Association (NBA).

Si Marcus Morris maoy gipiyalan sa Celtics sa pagpatuman ning maong duol na sa imposible nga tahas.

Gawas nga nakompleto ni Morris ang misyon, nakatabang sab siya sa opensa

sa Celtics ug mapasigarbuon siya sa iyang nahimo. “He’s obviously the best player in the game,” matod ni Morris kabahin kang James.

“Because I’m a competitor. He’s the best player, and I’m going to be able to tell my kids this one day.”

Gumikan sa paghasolhasol sa depensa ni Morris, si James nakamugna og playoff-high nga pito ka turnovers ug igo lang kining nakarehistro og 15 ka mga puntos nga maoy labing ubos nga iyang nahimo sa playoffs sukad masukad.

Gawas sa kanunay niyang paghasolhasol kang James, si Morris nakamugna sab og 21 puntos ug 10 rebounds.

Gipangulohan ni Jaylen Brown ang Celtics pinaagi sa iyang 23 puntos, nidugang og 20 puntos si Al Horford samtang nitampo og 16 puntos si Jayson Tatum.

Human nahatgan ni James og 7-4 labaw ang Cavaliers sa sayong bahin sa duwa, ang Celtics kalit lang ningpasutoy sa ilang opensa ug nimugna kini’g 17 ka wala’y tubag nga mga puntos aron iposte ang 21-4 nga rekord.

Wala na molingi pagbalik ang Celtics human niini.

Si Cavaliers coach Tyronne Lue midawat nang daan sa ilang kapakyasan sa nahabiling 7:09 minutos ug iya nang gipapahuway si James, usa lang lakang nga tataw aron iandam ang four-time MVP alang sa Game 2 nga ipahigayon ugma sa balwarte gihapon sa Celtics.

Taliwala sa dako nilang kapildihan, giklaro ni James nga wala siya mibati’g kabalaka bisan og gamay ug malaumon gihapon kini sa poruhan sa Cavaliers. “I have zero level of concern at this stage,” matod ni James, kinsa igo lang mitali og 5-of-16 shooting ug wala kini napasulod sa iyang lima ka threepoint shots.

Alang kang James, dili na bag-o alang kaniya nga adunay adlaw nga grabe ka ngil-ad ang iyang duwa.

“I’ve been down before in the postseason, but for me there’s never any level of concern -no matter how bad I played tonight, with seven turnovers, how inefficient I was shooting the ball,” dugang ni James.

“We have another opportunity to be better as a ball club coming in Tuesday night, and we’ll see what happens.”

Ang Cavaliers gipangulohan ni Kevin Love pinaagi sa iyang 17 puntos, niamot og 11 puntos si Rodney Hood samtang niamot og 10 puntos ang Fil-Am nga si Jordan Clarkson.

“I think we’re very alert to the fact that we’ll get a heavyweight punch on Tuesday night,” batbat ni Celtics coach Brad Stevens.

“It’s another great challenge, another great opportunity to experience something for this team.”