Gilupig sa pinalitay

Sa dakbayan sa Sugbo, sa makausa pa, naisahan na usab ni Mayor Tomas Osmeña ang mga oposisyon. Kon atong tukion ang dagan sa resulta sa niaging piniliay sa Barangay ug Sangguniang Kabataan, wa kini kalahian sa Election niadtong 2016. Sa naghinangat pa ang pinili-ay, kusog ang mga huhungihong nga lupigon ang mga kandidato nga kaalyado sa Bando Osmeña Pundok Kauswagan (BOPK).

Kini tungod sa mga isyu batok ni Osmeña nga nakahagdaw og daghang mga negatibong komento.

Gihula way siya sa iyang mga kaatbang nga gawas sa iyang pagka-arogante, maginukdanon pa yud kini niadtong mga tawo nga dili makauyon sa iyang gusto.

Apan, sa unsang pagka-unsaa, nga sa adlaw na sa piniliay, nibali na man ang hangin. Ang mga kaalyado na man hinuon sa BOPK ang sagad midominar.

Mao usab kini ang nahitabo niadtong 2016 nga elections. Sa wa pa ang piniliay, bisan kinsang habig ug bisan kapila pa buhata ang survey, molutaw nga si kanhi mayor Mike Rama maoy mopatigbabaw batok ni Osmeña.

Pero ang resulta, gilubong og kapin 34,000 ka mga botos si Rama. Buot ba ipasabot nga hangtod karon wa pa diay maleksiyon o kaha wa pa makakita og solusyon ang taga oposisyon unsaon pagpildi si Osmeña?

O kaha wa lang yud silay ikabuga batok sa mayor?

Ang gipakita nga labok ni Osmeña sa niaging duha ka piniliay naghatag lang kini og indikasyon nga sa sunod tuig hayag ang posibilidad nga siya gihapon ang modominar.

Ang giingong black propaganda ni Osmeña nga mao ang paghingan sa mga kapitan nga iyang gipangkiha tungod kay wala kini maka-liquidate sa kuwarta nga gihatag sa Cebu City government, dili maoy rason kon nganong daghan ang napildi sa ilang mga kapitan.

Ang tinud-anay mao nga gilupig sila sa pinalitay.