Kuwarta maoy naghari

Atong nasaksihan niadtong milabay’ng barangay ug Sangguniang Kabataan (SK) elections kon unsa yud ka hugaw ang piniliay dinhi sa atong nasud. Gawas sa mga dayag kaayong kalapasan sa mga kandidato sa atong

election laws, kuwarta maoy naghari niadtong eleksiyon. Nagtuo kita nga ang barangay ug SK elections, dili gastos. Apan morag regular election ang nahitabo.

Tiaw ba nimo kanang ang ubang mga kandidato sa pagka kapitan o bisan ang mga konsehal, migasto man og maayo aron masiguro ang ilang kadaugan. Ang mga political parties, mi-amot usab aron siguradong modaog ang ilang mga manok. Dinhi sa dakbayan sa Sugbo, ang “kanhi laos nga pulitiko” nga maoy nangulo sa Bando Osmena Pundok Kauswagan (BOPK) migasto og maayo labi niadtong mga barangay kansang kapitan atoa dapig sa oposisyon.

Tuod man, nagmalampuson sila. Nangapilde ang ubang mga kapitan nga taga oposisyon sama nila Kap Yody Sanchez sa Busay, Yvonne Feliciano sa Calamba, Bover Lequigan sa Kamputhaw. Tiaw nimo nang tag-P500 o P1,000 ang gipanghatag. Nanghatag usab ang taga oposisyon apan gamay ra kumpara sa taga BOPK. Didto sa Carcar City, si Mayor Nice Apura gipasanginlan nga namalit usab og boto pabor sa iyang nga kapitan. Kining vote-buying dili na yud ni mahunong o masumpo gumikan kay ang mga botante man mismo maoy magpapalit sa ilang boto. Bisperas pa lang sa eleksiyon, mangamang na ang mga kandidato house-tohouse aron manghatag og kuwarta. Inig adlaw sa eleksiyon, ang mga botante dili una mangadto sa polling precincts kay maghuwat og hatagan silag kuwarta sa mga kandidato.

Mao kanang kurapsiyon dili mahunong kon dili usbon ning atong batasan panahon sa eleksiyon nga modawat og kuwarta. Aber, asa man og kuwarta kining maong mga kandidato? Dunay uban nga maka-afford sa paggasto apan ang kadaghanan nagsalig sa mga pulitiko og mga partido. Unya asa man pod og kuwarta kining maong mga pulitiko? Alangan man og mogasto sila sa ilang hinaguan nga kuwarta. (bobbygnalzaro@ gmail.com)