Once there was a promise

Mikatawa si Alfred. “Naunsa ka diha, Alfred, nga mora ka mag gigitik sa agta?” Nahimuot na lang ko. “Abi kog nagkauyab gyud mo si Ramon? Wa diay siya mangulitawo nimo, Roxan?”

“Nangulitawo man pero ambot ba nga wa na man siya mobalik dihang akong giingnan nga kon duna nay panumpa, barogan gyud.”

“Ingon lang ana ang imong giingon unya mihunong na sa iyang tuyo nimo? Aw, nahadlok tingali nga manumpa sa imong atubangan?”

Mitukikig katawa si Alfred. Nakapanglingo na lang ko. Hasta ko nahikatawa na lang sab. Sukad pa kaniadto, madasigon nang pagka tawo si Alfred, morag wa sa iyang bokabolaryo ang kaguol.

“Bitaw, uy. Talawang manumpa nako.” Nakig-aper si Alfred nako. “Unya, ikaw, Al, pilay imong girlfriend nga gibilin mo sa Davao?”

Naghinuktok si Alfred. Mikalit lang siyag seryuso. Gipasagdan ko siya sa iyang sitwasyon.

Naghuwat ko nga iyang tubagon. Unya mitan-aw siya nako. Nagpahiyom na sab. Nawala na ang kaguol nga nakita ko niya.

“Duna man koy uyab didto, Roxan. Duha sila pero wa nako dungana. After sa usa, nanguyab na sab ko. Then, mihunong na ko.”

“You mean, nagkabuwag mo sa duha mo ka uyab? Ngano man, Al? Ah, nakasabot na ko, pul-anon ka sa uyab, no? Dali ka rang mawad-ag love niya.”

“Di man ingon ana, Roxan. Na-in- love baya ko nila. Pero ang ilang kinaiya maoy di ko maagwanta. Very selosa. Morag gusto nila nga sila lang ang tagaan ko sa tanan kong atensiyon. Di sila gusto nga makig-estorya kog laing girl.”

“Wow! Sila gyung duha, parehas og kinaiya?”

“Mao lagi. Mitagam na ko. May pa ang akong pag-study na lang ang tagaan kog dakong pagtagad.”

“Bitaw, no, Al. Lisod gyud pangitaon ang opposite sex nga atong ikasinabot. Pero para nako nuon, kon makauyab ko, once there was a promise, wa na gyuy atrasay.”

“Ang buot mong ipasabot, Roxan, nga wa kay boyfriend ron?”

“Yes! Tinuod gyud na, Alfred. Zero ko sa akong lovelife ron. Naa koy mga suitors. Basig usa nila akong mapilian ug sugton. Pero sa pagka karon, gipanid-an ko pa ang ilang kamatinud-anon nako, especially ang ilang attitude.”

Gisultihan ko sa tinuod si Alfred. Gitan-aw ko niyag dugay.