Alaska misupak sa pagkabalik ni Balkman
Wala makauyon si Alaska Team owner Alfred Uytengsu sa pagkalibkas sa lifetime ban ni Reynaldo Balkman sa Philippine Basketball Association (PBA).
Gihulagway ni Uytengsue nga kataw-anan kining maong desisyon sa bag-ong komisyoner nga PBA nga si Willie Marcial.
“The commissioner’s decision to overturn the lifetime ban on Balkman is ridiculous,” matod ni Uytengsue sa interbyu sa SPIN.ph.
“What good are sentences if they are simply overturned because the erring party ‘apologized?”
Si Balkman gipamulta og P250,00 ug gisilutan og lifetime ban sa PBA human niya gituok ang iyang kanhi kauban sa Petron nga si Arwind Santos niadtong 2013 PBA Commissioner’s Cup batok sa Alaska Aces. Si Santos misuway ra sa pagpakalma kang Balkman niadtong higayuna gumikan kay napungot kini’g grabe sa tawag sa referee.
Nakabalik og duwa si Balkman sa Pilipinas diin iyang natabangan ang San Miguel Alab Pilipinas sa paglangkat sa korona sa Asean Basketball League (ABL).
Ang pagduwa ni Balkman sa Alab Pilipinas gituohan nga nakatabang kaniya aron makasubay sa dalan pabalik sa labing unang professional nga liga sa Asya.
Niadtong Marso 27 opisyal nga glibkas ni Marcial ang lifetime ban ni Balkman human kini nangayo og pasaylo kang Santos ug ni kanhi commissioner Chito Salud, kinsa maoy nipahamtang sa iyang silot.
Niadtong Martes, opisyal nga gianunsyo sa San Miguel Beermen nga ilang gikuha og balik si Balkman isip hulip sa dili epektibong import nga si Troy Gillenwater.
Ang Puerto Rican cager moduwa na sa Beermen karong Sabado batok sa Alaska sa usa ka out-of-town game sa Dumaguete City.