Cavaliers nameligro
Wa pa man tuod hingpit nga mawad-i sa paglaom, apan sa sitwasyon karon sa Cleveland, diin gilubong na usab sila kagahapon sa Boston sa Game 2, 107-94, sa Eastern Conference finals, angayan na siguro maalarma na niini si LeBron James ug ang tibuok puwersa sa Cavaliers.
Kini tungod kay ang duha ka sunodsunod nilang kapildihan sa mga kamot sa Celtics nga didto mismo mahitabo sa TD Garden, dili tungod kay korte sa Boston ang mga duwa kon dili gilupig gyud sa diskarte.
Usa sa nahimong mahait nga hinagiban karon sa Celtics mao kining ilang depensa nga nakapaguba sa opensa sa Cavaliers.
Sukwahi sa ubang mga teams, ang Boston wala mogamit og double-teaming defense ngadto ni James, apan epektibo nilang gipahimuslan ang switching sa pagdepensa sa four-time MVP.
Duna gani higayon nga ang 6-1 nga si Terry Rozier maoy moguwardiya ni James apan sa dili pa mo-take advantage sa mismatch ang Cavaliers, sa kalit lang, mobanos sa Al Horford.
Kining ingon aning sitwasyon maoy nakahatag og labad sa ulo ni Cleveland coach Tyronne Lue.
Duna man tuoy nga sitwasyon nga malibre ang Cavaliers sa gawas nga bahin, pero wa sab mangigo ang ilang mga shooters.
Ug naobserbahan nga kon itandi sa mga nanglabayng duwa, mas nikunhod ang pagdawat ni James og bola, butang nga maoy prayoridad sa Celtics.
Sa playoffs, daw sa erratic na usab ang jump shot ni James. Mangigo man tuod siya sa mid-range apan ang percentage sa iyang three-point shots sa niaging duha ka mga duwa mikunhod og maayo diin sa 52 niya ka attempts, 15 lang ang iyang napasulod.
Pero ang akong namatikdan mao kining rotation ni coach Tyronne Lue sa iyang mga tawo.
Daghang mga potential nga mga batan-on nga nabira ang Cavaliers pinaagi sa trade sa sayong bahin ning tuiga, pero wala niya ma maximize ang mga talent niini.
Pananglitan, si Jordan Clarkson nga usa ka slasher makatabang unta sa ataki sa Cavaliers pero limitado ang playing time. Ang kalagsik niini makahasol unta sa opensa ug depensa sa Celtics kay dili man sab tag-as ang iyang mga counterpart.
Apan mao lagi na, pito ngadto sa walo ra ka tawo ang gustong gamiton ni Lue, mao nga taas ang percentage nga lupigon gyud sila sa lahutay.
Sukwahi sa Celtics, nga mohatag gyud og break si coach Brad Stevensons sa iyang mga bag-ong players.
Ug magpadayon man gani ning style sa dinuwaan sa Cavaliers ug di gihapon sila maka gihapon maka-adjust sa ilang depensa ug opensa, halayo ra sa tinuod ang pangandoy ni James nga makataak sa ikawalong sunodsunod nga higayon sa finals, butang nga pipila lang ka mga players niini ang nakahimo sa ingon.
Kon unsay mapakita sa Cavaliers sa Game 3 nga gikatakda sa Dominggo, kini maoy mahimong sukaranan sa ilang kapabilidad ug chance nga mahibalik sa finals.