PAGDILI SA BONNET HUGTAN PA
TALIWA SA SUNODSUNOD NGA PATAY SA LAPU-LAPU CITY
Buot ni Lapu-Lapu City Mayor Paz Radaza nga istriktuhon kaayo ang pagpatuman sa bonnet ordinance human sa sunod-sunod nga mga insidente sa pagpamusil sayo ning semanaha.
Gawas niini, gitataw sa mayor nga iya nang gitahasan ang Lapu-Lapu City Police Office (LLCPO) nga mas pahugtan ang kampanya niini batok sa kriminal ug ipakita ang pwersa sa kapulisan.
Ang mando gihimo sa mayor human tulo ka mga tawo ang nahimong biktima sa tulo ka mga pagpamusil niadtong Lunes ug Martes sa buntag diin duha sa mga biktima ang nangamatay.
“Atong giingnan ang kapulisan nga ipakita ang kalihukan sa pulis nga mawala ni ang ingon niani nga panghitabo. I think they have to do something kay ako gani niingon man gyud ko nga istriktuhon (ang bonnet ordinance),” ni Radaza atol sa press conference niadtong Martes.
Ang city ordinance no. 206-2009 sa Dakbayan sa Lapu-Lapu nga giaprobahan niadtong Mayo 25, 2009 nagtinguha nga dali mailhan ang mga kriminal ilabi na ang mga
riding-in-tandem nga mga suspek nga kalit mamusil sa ilang mga biktimahon.
Susama sa dakbayan sa Mandaue, gidili sa maong ordiansa ang full-face helmet nga
tinted ang tabon. Mahimo isul-ob ang tinted nga helmet apan ipasaka ang tabon niini aron makita ang nawong.
Hugot nga gidili ang bonnet o mga butang nga makatabon sa nawong way labot ang prescribed
helmet nga gitugutan sa balaod. Apan sa kadtong mag-mask, mas maayo nga adunay medical certificate nga maipakita ang drayber o pasahero nga nag-sul-ob niini.
Sumala pa ni Radaza nga way undang ang kapulisan sa Dakbayan sa paghimo sa ilang trabaho, apan mas maayo kon kakunayon nila ang check point o himuon kining one-time big
time aron mapuhag ang mga kriminal nga kompyansang naglaroylaroy sa kadalanan.
Di hinuon kombinsido si Radaza nga election-related ang mga pagpamusil sanglit ang kapulisan nagkanayon nga kini posibleng may kalambigitan sa drugas.
Niadtong Martes sa buntag, patay diha-diha ang usa ka 33 anyos nga si Jose Zabate kinsa gikan pa sa husay sa iyang kaso sa iligal nga drugas sa Branch 54 sa Hall of Justice didto duol sa City Hall.
Kuyog pa si Zabate sa iyang misis human sa hearing sa dihang nahitabo ang pagpangatake sa gunman, kinsa wa nisibat hangtod wa masiguro nga namatay ang biktima. Gibirahan sab ang kanhi
ex-convict sa riding-in-tandem sa Sitio Santa Maria, Brgy. Pusok niadtong Lunes sa gabie human sa eleksyon.
Duha pa lang ka semana nakagawas sa bilangguan ang biktima nga si Ricardo Rafols, 32 ug atol sa insidente, naglingkod lang kini sa giparking nga motor sa dihang kalit nga gipusil-patay.
Niadtong Lunes sa gabii, ang 33 anyos nga traysikol drayber nga giila nga si Jinky Paolo Apatan sa Brgy. Basak ang kalit sab nga gipusil.
Sa kasamtangan, si Apatan nagpaalim sa tambalanan.
Kaubang drayber ang gidudahang suspek sa pagpusil kaniya. /