LABELLA WA MABALAKA SA RESULTA SA ELEKSYON
Wa mabalaka si Bise Mayor Edgardo Labella sa resulta sa piniliay sa barangay diin 30 gikan sa 80 nila ka mga kandidato ang nidaog sa pagka-barangay kapitan niadtong Mayo 14.
Si Labella nagkanayon nga mahinungdanon ang mayoriya sa pagpapili sa pangulo sa Association of Barangay Council (ABC) ug nibutyag nga ilang gitahod ang hukom sa katawhan.
Sa pagkakaron, ang ABC sa Cebu City gipangulohan ni Phillip Zafra kinsa nasublian pagkakapitan sa Barangay Tisa niaging eleksyon.
Ang bise mayor sa Dakbayan sa Sugbo nagkanayon nga di sila babag sa administrasyon ug unsay kalambuan nga matagamtaman sa mga Sugbuanon basta ilang masiguro nga di dehado ang Siyudad, mosuporta sila.
Sa wa pa ang barangay ug Sangguniang Kabataan elections, ang Team Rama maoy nagkontrolar sa ABC diin 65 ka incumbent ang ilang kaalyado samtang 15 ra ang Bando Osmeña Pundok Kauswagan (BOPK)
Nausab og kalit ang kamada sa barangay human sa piniliay niadtong Lunes diin 49 ka mga kapitan ang nakadaog sa habig sa BOPK samtang 30 lang ang nakuha sa Team Rama.
Base sa partial unofficial record gikan sa City Hall, naglabaw usab ang mga SK chairman sa BOPK kon itandi sa Team Rama 41-39.
Si Zafra, sa iyang bahin, nagkanayon nga way permanenti sa pulitika ug ilang gidawat ang nahitabo sa niaging piniliay. “That’s part of the reality in politics, if there is a shift of majority, then the barangay captains will decide specially on the matters pertaining to the ABC. At the end of the day, the barangay captains will decide to whom they are going to choose for ABC president,” matod sa kapitan sa Tisa.
Mag-atbang sa pagka presidente sa ABC mao si Zafra, kinsa maoy pambato sa Team Rama, samtang si barangay captain-elect Franklyn Ong sa barangay Kasambagan sa habig sa BOPK.
Bisan kon dehado na sila sa gidaghanon sa mga kapitan
apan si Zafra wa pa mosurender sa iyang bandera. “The battle is not yet over until all the votes are counted,
huwat lang ta,” dugang sa kapitan nga gitawag og “Zorro’.
Samtang ang giangkon nga 31 sa Team Rama nakuhaan og usa.
Matod ni manlalaban Gines Abellana, kinsa nidaug pagkakapitan sa Barangay Mambaling, sa iyang text message sa Sun.Star, niingon nga di siya sakop sa Team Rama.
Nidagan siya isip usa ka independente kay ang BOPK ug Team Rama dunay kandidato. "Please take out my name as Team Rama winning candidate
for punong barangay in Mambaling since I am an independent candidate,” matod ni Gines sa iyang text message. /