Publikong mga tunghaan mobukas sa Hunyo 4

Pampublikong tunghaan posibleng ablihan karong Hunyo 4 alang sa pagsugod sa klase apan wa pay pormal nga calendar ang gipagawas.

Nagkanayon si Dr. Bianito Dagatan, Schools Division Superintendent sa Cebu City, nga karong Hunyo 4 ang gitan-aw nga petsa sa pag-abli sa klase kon way mga kakulian ug mga adjustment nga mahitabo ug base lang kini sa komunikasyon nga ilang nadawat apan wa pay pormal nga calendar ang gipagawas di pareho sa mga niaging tuig.

Nasayran, nga ang Kongreso nga dunay giduso nga balaodnon nga hiusahon na ang pagbukas sa academic year sa tanang mga tunghaan sa tibuok nasod karong tuiga.

Apan wa pa kini maaprobar sa Kongreso bisan pa man nga aduna nay mga tunghaan sa nasod nga ang nagbukas sa ilang klase matag Agusto.

Gikataho nga si Education Secretary Leonor Briones namahayag nga ang pabilin sa buwan sa Hunyo ang pagbukas sa mga klase sa mga publikong tunghaan.

Nitataw si Briones nga haum ra ang Hunyo sa pagbukas sa klase sa nasod.

Adunay Regional Brigada Skwela Kick off karong Mayo 26 sa Bohol ug sugdan na usab ang Brigada Skwela sa mga tunghaan sa siyudad sa Sugbo karong umaabot Mayo 28 ngadto sa Hunyo 2.

Di ang skwelahan ra ang iandam apan apil na usab ang mga maestra ug kini pagahimuon karong Mayo 16-18, diin “adunay In-Service Training Program for Teachers ug Teacher Induction Program, alang sa mga bag-o ug mga mamahimong maetsra," saysay ni Dr. Leah Apao, Assistant Schools Division Superintendent sa Cebu Province.