CP, USC KAMPIYON
Gilangkat sa Cebu Province ang korona sa men’s division crown sa Cebu City Mayor’s Cup Volleyball Open pinaagi sa pagmakmak sa Southwestern University (SWU)-Phinma iConnect sulod sa tulo ka sets sa finals kagahapon sa University of San Carlos (USC) Main Gym.
Sukwahi sa ilang gipakita sa semi-finals, mas han-ay ang opensa Cebu Province sa paggiya ni veteran setter Norvie Labuga, kinsa maoy napiling
MVP sa kompetisyon.
Ang mga ataki nila ni Alden Dave Cabaron ug Mark John Pacquiao mao ang labing kuyaw nga hinagiban sa Cebu Province nga mirehistro og 25-18, 25-15, ug 25-14 nga kadaugan.
“I’m very happy that we won. We had a bit of chemistry already,” matod ni Cebu Province head coach Grace Antigua sa interbyu sa Sun.Star Cebu, igsuong buhatan ning mantalaan. Nagtuo si Antigua nga ang mas taas nilang kasinatian mao
ang naghatod kanila sa kadaugan batok sa mas batan-ong puwersa sa SWU-Phinma.
“We mixed it up. Most of our players have already graduated and are seasoned. There is a huge difference with experience. Experience is the best teacher,” dugang ni Antigua. Sa sunod nilang misyon, ang Cebu Province mokombati sa umaabot nbga Philippine National Games (PNG). “We don’t know yet (about our competition). There are
a lot of teams Manila can’t be taken lightly. Bacolod is also a
tough team,” asoy ni Antigua. Sa laing bahin, ang USC maoy miangkon sa women’s
title pinaagi sa makutas nga kadaugan batok sa Cebu Spikers Volleyball Club nga miabot og lima ka sets.
Ang USC mao ang mingdaog sa nag-unang duha ka sets, 25-18 ug 25-22, apan mingbawos ang The Lady Warriors sa nagsunod nga duha ka sets, 25-16, 25-19 aron tablahon ang hinampakay.
Nahigmata ang opensa sa USC sa final set aron angkunon kulbahinam nga kadaugan sa
deciding set. 15-10.
Si Julia Garcia maoy napiling MVP.