Parks mireklamo sab sa MPBL

Miapil na si Bobby Ray Parks sa nagkataas nga listahan sa mga ningpadayag sa ilang kapungot sa bagong lagda sa Maharlika Pilipinas Basketball League (MPBL) nga limitahan lang og tagsa ka Fil-foreigner nga dili molapas og 6’4” ang gitas-on ang ilang matag miyembrong team alang sa sunod komperensya.

Sila si Parks ug Lawrence Domingo, mga sakop sa San Miguel Alab Pilipinas nga ningkampiyon sa Asean Basketball League (ABL), nakatakda untang moduwa sa expansion team Mandaluyong El Tigres sa sunod nga komperensya sa MPBL.

Apan nagkanayon si MPBL commissioner Kenneth Duremdes nga kinahanglang mopili ang El Tigres kon asa nila ni Parks o Domingo ang kuhaon gumikan sa bag-ong lagda sa liga.

Si Parks, anak ni seven-time Philippine Basketball Association (PBA) best import American Bobby Ray Parks ug sa usa ka Pinay nga inahan, natawo ug nagdako sa Pilipinas.

Apan giklaro ni Duremdes nga sa bag-ong lagda sa MPBL, gikonsiderar si Parks nga usa ka Fil-foreigner gumikan kay aduna man kini sagol nga langyaw nga dugo.

“First time in my life I was considered an American in my own country,” pabuhagay ni Parks sa iyang Twitter account @ray15parks.

Si El Tigres coach Mac Cuan misempatiya kang Parks.

“Ray was born here, grew up here, played college ball here, played for the national team to represent our country, and most of all has a Philippine passport. Why is he not considered a local?” matod ni Cuan.