CELTICS 2-0 NA
Giusban pagbuntog sa hosts Boston Celtics ang Cleveland Cavaliers, 107-94, sa Game 2 kagahapon aron pagposte og 2-0 nga bintaha sa Eastern Conference finals series sa National Basketball Association (NBA).
Ning higayuna, wala man tuod kapugngi sa Celtics ang hari sa Cavaliers nga si LeBron James dili sama sa Game 1 apan nakakita gihapon sila og pamaagi aron angkunon ang laing kadaugan.
Si James, kinsa igo lang nimugna og 15 puntos sa 83-108 nga kapildihan sa Cavaliers sa Game 1, nagpakatap og triple-double nga 42 puntos, 12 assists ug 10 rebounds apan wala ra gihapon kini magsilbe.
Ang mga magduduwa sa Celtics nagtinabangay sa usa’g usa sa bisan asa nga departamento nga maoy nagsilbe nilang labing lig-ong hinagiban.
Unom ka mga magduduwa sa Celtics ang nakamugna og dobleng numero nga puntos pinangulohan ni Jaylen Brown pinaagi sa iyang 23 puntos.
Si Terry Rozier, kinsa maoy nidala sa haw-ang nga nabiyaan sa naangol nga si Kyrie Irving, nidugang og 18 puntos alang sa Celics.
Nitampo og 15 puntos si Al Horford, nidugang og 12 puntos si Marcus Morris samtang ningtunol og 11 puntos matag usa sila si Jayson Tatum ug Marcus Smart.
Ning maong playoffs, ang Celtics wala pa sukad nakatilaw og pilde sa ilang balwarte sulod na sa siyam ka mga duwa.
Tatawng dili na mabangbang ang kadasig sa Celtics ning puntoha gumikan kay sukad masukad, wala pa sila napakyas sa mga higayon nga nakamugna sila og 2-0 nga bintaha sa series.
“We’re going to fight,” batbat ni Rozier. “At this point we don’t care if we win by half a point. If we win, that’s all that matters.”
Pagsugod pa lang sa duwa, nagbangis na dayon si James ug gimugna niya ang 21 sa kinatibuk-ang 27 puntos nga nahimo sa Cavaliers sa 1st quarter.
Apan kalit lang nibahar ang duwa ni James human siya nakatilaw og bun-og sa iyang liog sa 2nd quarter.
Taliwala sa nahiaguman sa Cavaliers, si James malaumon lang gihapon nga makabangon ra sila sa pagtapon sa kombati sulod sa ilang balwarte alang sa magsunod nga duha ka mga duwa sa best-of-seven series.
“I think I’ll be fine. I’m not going to lose sleep over it. You go out and when you lay everything on the line, at the end of the day, you can live with that,” matod ni James.
“They did what they had to do, and that was protect home, and now it’s our time to try to do that, as well.”
Si Kevin Love nidugang og 22 puntos ug 15 rebounds samtang mihatag og 11 puntos si Kyle Korver.
Ang ubang starters sa Cavaliers nga sila si Tristan Thompson, JR Smith ug George Hill igo ra nga nagkumboya og 11 puntos.