MIDAUG SA PAGKA KAPITAN GIATAKE, PATAY
SAKOP SA BOPK NGA GISAKBANG SA KANDIDATO SA TEAM RAMA SA DULJO
Bag-ong nakadaog sa pagka barangay kapitan sa Duljo Fatima nga si Joel Ycong napalgang patay sulod sa iyang lawak sa sitio Plastikan, Barangay Duljo Fatima sa syudad sa Sugbo.
Si Ycong nagpapili ubos sa Bando Osmeña Pundok Kauswagan (BOPK) sakbang kang Juliet Abella, asawa ni incumbent barangay captain Elmer Abella.
Gituohan sa kapulisan nga giatake kini sa kasingkasing ug namatay kagahapon sa kaadlawon human nagselebrar sa iyang kadaugan uban sa iyang kabanay ug mga dumadapig.
Ang barangay tanod sa Duljo Fatima nga si Zaldy Racaza nga nainterview sa sibyaanang dyHP nitug-an nga pasado na ala una kagahapon sa kaadlawon nauli ang bagong napili nga kapitan gikan nga nag inom-inom.
Matod ni SPO1 Winston Ybañez, imbestigador sa Homicide Section sa Cebu City Police Office pasado na sa alas 3 sa kaadlawon natulog si Ycong human nag-inom ug nag salo-salo.
Sa wala pa matulog si Ycong, nagpasugo matod pa, kini sa iyang anak pagpalit og tambal sa high blood.
Human makainom sa maintenance nga tambal, giingong nisulod na kini sa iyang lawak apan pagka alas dose sa udto kagahapon, natingala sila nga wala na kini momata pa.
Giablihan sa usa sa mga miyembro sa pamilya ang kwarto ni Ycong ug dako nalang ang ilang kakurat nga wa na kini mag ginhawa ug namatay na.
Dali sila nga nanawag og tabang gikan sa Emergency Medical Services (EMS) sa Barangay Duljo, apan zero vital sign na kini.
Gituohan nila nga upat na ka oras namatay si Ycong sukad nakaplagan tungod kay nianam nag burot ang lawas niini ug milagom na usab. /