Pagtukod sa pier gipaundang
Bisan kon gipahunong na ni San Fernando Mayor Lakambini “Neneth” Reluya ang trabaho pagtukod og international nga pantalan sa Barangay Sangat, ang contractor padayon naghimo sa proyekto pinaagi sa pagtambak og yuta sa dapit niadtong Martes.
Ang mayor nagpatabang sa kagamhanan sa lalawigan sa Sugbo ug hingtungdang mga ahensiya sa gobiyerno aron mapugngan ang First Sangat SF International Port Corp. sa pagpadayon sa bilyones ka pesos nga balor sa proyekto.
Apan sumala ni Ruben Feliciano, presidente sa FSSFIPC, ang Department of Environment and Natural Resources, Cebu Port Authority o ang korte ug dili ang buhatan sa mayor, ang makapahunong sa proyekto.
“This is not a government project, Mayor Reluya should not intervene nor interfere in this project,” pahayag ni Feliciano sa text message nga gipadala sa SunStar Cebu.
Niadtong Pebrero 27, 2018, ang mayor niluwat og Executive Order No. 5 nga nisuspenso sa bisan unsang konstruksyon, kalamboan, ug reclamation projects bahin sa himuong pantalan sa baybayon ug coastline sa Barangay Sangat gumikan sa legal nga mga kontrobersiya nga naglimin sa joint venture sa duha ka mga kompaniya ug sa mga kausaban sa mga proponent sa orihinal nga ni-apply alang sa proyekto.
Apan si Feliciano nipasangil nga gipagawas sa mayor ang EO No. 5 aron panalipdan ang kanhi partner- contractor sa proyekto, ang Melekon Contractors Inc. ug ang personal nga interes ang maong opisyal.
Aduna pa kini dugang mga pasangil batok ni Mayor Reluya apan, gipugngan una niining mantalaan samtang wala pa makuhai og habig ang babaye nga opisyal sa pagkutlo ning balita. Iyang gihulagway nga usa ka harassment ug illegal ang maong EO.
Sumala ni Mayor Reluya wala tumana sa First Sangat ang iyang executive order human nikuha kini og provisional permit to construct a private non-commercial port sa CPA. /