P2-3T kitaon sa mama sa anak

Mokita og P2,500 hangtod sa P3,500 sa usa ka semana ang inahan nga taga lungsod sa San Fernando nga nigamit sa iyang nga anak nga babaye sa cyberpornography.

Kini ang gibutyag ni Sr. Supt. Romeo Perigo, hepe sa Women and Children Protection Center-Visayas Field Unit Chief sa gipahigayong press conference kagahapon.

Matod niya, ang kwarta ipadala pinaagi sa money transfer gikan sa ilang gitawag nga “client o sponsors.”

Si Bise Gobernador Agnes Magpale di makatuo nga gikan sa overseas Filipino workers (OFW) ang gipadala nga kwarta pinaagi sa remittance center sobra sa kaduha ka higayon sa usa ka adlaw.

”These are legitimate business… it’s only being used by some illegitimate business pareha ining online pornography,” sumala sa bise gobernador.

Matod niya nga nitabang ug nakiglambigit ang mga remittance center sa ilang kampanya pagsumpo sa cyberpornography pinaagi sa pag-report kon sila makabantay nga nagsige og balik-balik ang usa ka ngalan ug angay na silang maalarma.

“There are so many money transfers in one barangay...bright man sad ang perpetrators gabalhin-balhin sila. So, the formula doesn’t work anymore. So, nangita nasad ta og laing paagi nga madakpan sila,” dugang ni Magpale.

Siya nipadayag nga angay mobalik sa pagtudlo sa mga ginikanan ngadto sa ilang mga anak sa insakto nga pamatasan aron malikay sa ingon niini nga dautang binuhatan.

Nakig-alayon sila sa mga magtutudlo aron matudloan ang ilang mga tinun-an nga di maayo ang pagsud sa maong buhat.