WATER FIGHT SA SONGKRAN FESTIVAL
Di ikalimod nga ang nasud sa Thailand maoy usa sa mga labing nindot nga destinasyon sa South East Asia.
Gidugok kini sa mga minilyong turista sa nagkadaiyang suok sa kalibutan nunot sa katahum sa mga templo ug mga nagkadaiyang mga talan-awon sa nasud.
Nabantog usab ang Thailand sa ilang “Songkran Festi- val”, ang ilang New Year Festival diin mahitabo ang ang giisip nga labing lapad nga
“water fight” sa kalibutan. Kon hilig ka og adventure, basa-basa, ug pasirit og tubig, mas maayo nga imong suwayan nga mosalmot sa ilang Songkran.
Mahitabo ang Songkran Festival sud sa tulo ka adlaw gikan Abril 13 hangtod sa 15. Sa ubang mga dapit sa nasud, mosaulog kini hangtod ngadto sa lima ka adlaw.
Sa milabayng buwan, nisalmot ning tigsuwat sa tinuig nga kalihukan sa maong nasud didto sa Bangkok.
Sa Bangkok, ang labing wild nga water fight mahitabo sa Khao San Road ug Silom area. Dinhi nimo magpundo ang bagang duot sa mga Thai ug mga lan yaw na mosalmot sa festival.
Lingaw ang Songkran Festival ilabi na kon kuyog nimo imong mga higala ug pamilya sa pagsaulog niini nga kusog mosadsad.
Kon di ka ganahang mabasa sa imong pagbisita nga maatol sa festival, mahimo ka nga mobisita sa ilang mga templo.
Ani-a ang pipila sa mga pahimangno ug angay nimong bantayan kon ikaw mosalmot sa selebrasyon:
1. Water Gun - Kun gusto ka nga mosalmot sa pasiritay og tubig, mas maayo nga mopalit ka og water gun. Ang water gun nagkantidad gikan sa 150 baht (mga P246) pataas depende sa gidak-on. Mas dako nga water gun mas maayo. Hinumdumi nga di libre ang tubig kon imong sudlan og tubig ang water gun, ang refill ana-a sa 5baht (P8), 10baht (P16) o 15 baht (P25), depende sa gidakon sa imong water gun.
2. Limpyo nga tubig - Giawhag ang mga mosalmot sa Songkran nga mogamit
og limpyo ug di kontaminadong nga tubig. Gawas niini gidili ang paggamit sa mga water gun o water hose nga kusog kaayo mosirit (high pressure) aron di makasakit sa uban.
3. Wet powder - Ang mga Thai mopahid nimo og susama sa mud mask/wet powder sa imong nawng o senina. Ayawg likaw niini. Kon mapahiran ka, gikonsiderar kini nila nga “blessing”. Apan pagbantay sa kamot sa mga mopahid nimo basin kini hugaw. Sa samang bahin, pag-andam og tubig nga iwaswas sa wet powder sa imong nawong aron di kini mobantok sa imong nawong.
4. Pagsul-ob og gaan nga senina - Likayi ang pagsul-ob og bug-at nga biste sanglit mobug-at kini kung mabasa ka. Hinumdumi nga mahitabo ang pasiritay og tubig tibuok adlaw maong mas girekomendar ang pagsul-ob ug gaan nga tela sa biste. Mas maayong ikaw mag-tsinelas sab. Base sa akong nabantayan, magsul-ob sab og mga floral polo o shirts ang mga Thai kon mag-Songkran.
5. Waterproof bags - Kon ikaw maglakawlakaw atol sa Songkran og makigpasiritay og tubig, mas maayo nga isud nimo imong mga gadgets ug kwarta sa waterproof nga bag, sa zip lock o water resistant pouch. Kini aron kalikayan nga mabasa ang imong mga importanteng gamit sama sa cellphone ug kwarta.
6. Sunblock ug kalo - Mahitabo ang Songkran atol sa labing init nga mga adlaw sa nasud busa girekomendar nga ikaw magpahid og sunblock o di ba kaha magsul-ob og kalo kon mosalmot sa kalihukan. /