Maoy mabasol

Sibaw ang mga estorya nga grabe ang pinalitay sa miaging eleksyon. Bisan gani kuno ang pipila ka local officials, labina mga mayor, grabeng mipabaha og kwarta aron suportahan ang ilang mga kaalyado. Kinahanglan kining buhaton sa mga opisyal tungod kay eleksyon na usab sunod tuig. Mas bentaha kon ang naa sa poder sa mga barangay, imohang mga kaalyado kay duna ka nay kasaligan sa ilang mga balwarte.

Duna say di gustong mapilde mao nga naay nahungihong nga nangutang og minilyon aron ipamalit og botos kay lig-on ang ilang kontra.

Ning nasura, grabe ang kurapsyon sa mga opisyal sa kagamhanan. Gani, ginaingon nga ang kurapsyon kabahin na sa sistema. Way proyekto nga ang tipik sa kwarta di mahiadto sa bulsa sa mga opisyal nga nagpasiugda niini kun standard operating procedure (SOP) na.

Nganong naingon man niini ang kahimtang sulod sa kagamhanan? Kini tungod ra sab sa katawhan nga dali nga makabaligya sa ilang botos panahon sa eleksyon.

Asa man diay mamawi ang mga opisyal nga nagpabaha sa ilang kwarta panahon sa eleksyon? Unya og naa na sila sa pwesto. Hinuon, dunay mga opisyal nga nangapili sa patas nga pamaagi kay duna usab silay igong track record nga napakita.

Apan duna say napili tungod kay duna silay sponsor, kanang gitawag og kingmakers. Himuon ra usab silang tigpanalipod sa interes sa mga tawo nga nagpaluyo kanila.

Mao na nga hangtod karon, ang nasod wa makairog. Kini tungod ra sab sa mga tawo nga dali nga mokangkang ang mga kamot basta makakita na og kwarta.

Magsige og reklamo nga way ayo ang kagamhanan. Kinsa ra man sab ang nagbutang sa piniling mga opisyal, di ba ang katawhan nga ningbotar panahon sa eleksyon? Ug kinsa man ang mabasol?