‘Wederweder’ politics
Base sa resulta sa barangay ug Sangguniang Kabataan (SK) dinhi sa dakbayan sa Sugbo diin nangharus ang mga kapitan ug SK chairmen nga kaalyado sa Bando Osmena Pundok Kauswagan (BOPK), mausab na ang kamada sa konsiho kon manglingkod na ang Association of Barangay Council (ABC) ug SK federation president.
Ang ABC president ug SK federation president molingkod sa konseho isip mga ex-officio
members diin modawat sila og susamang suweldo ug benipisyo nga gidawat sa mga elected councilors. Ug kay sigurado man nga ang taga BOPK maoy modaog sa ABC ug SK, mamahimo nang mayoriya ang BOPK.
Sa pagkakaron, nagtabla pa ang BOPK ug Barug PDP-Laban
diha sa konsiho diin adunay 8-8 ka membro. Labaw unta ang Barug PDP-Laban apan gitangtang man si Konsihal James Cuenco ug wala pa makakuha og temporary restraining order sa Court of Appeals. Kon magtabla ang botasyon, si Vice Mayor Edgardo Labella ang mobuak sa tabla ug natural adto siya modapig sa ilang grupo.
Inig lingkod unya sa ABC president ug SK federation president, aw, molabaw na ang BOPK kay napulo naman sila batok walo. Importante ang numero diha sa konsiho habig sa administration aron masuportahan ang mga legislative agenda sa administrasyon. Sayon ra unya ang pagpasar og mga ordinansa habig sa administrasyon.
Sama anang gitanyag sa negosyanteng John Gokongwei nga mobubo og P18 bilyones nga proyekto nga hotel ug resort diha sa South Road Properties (SRP) nga wala ma-aprobahi sa konsiho kay supak ang taga oposisyon, mapasar na unya na. Magkatawa na unya kanang “kanhi laos nga pulitiko” diha kay majority naman ang iyang mga alipores. Mao nay giingon ni kanhi President Joseph Estrada nga kining pulitika “weder-weder” lang.
Sayon ra unya ang pagpasar og mga ordinansa habig sa administrasyon.