TEEN ROMANCE Once there was a promise
Nahapak kog hinay ang bukton ni Alfred. “Naunsa ka diha, Alfred? Ngano gud tawon nga ingon man ana ang tinan-awan mo nako?”
“Nahunahuna ko lang, Roxan, nga puyde pa diay.”
Nakunot ang akong agtang nga mitan-aw pag-ayo kang Alfred.
“Unsay puyde pa?” “Nga moapil sa imong mga suitors nga imong pilian.”
Mikidhat si Alfred nako. Gingisloan ko siya.
“Na, mosamot nga maglibog ko kinsay akong pilion, Alfred. Ayaw na lang pag-apil-apil.”
Gihiwian ko si Alfred. Mikidhat na sab siya nako.
“Tinud-anay baya ning ako, Roxan. Dugay na kong nakagusto nimo, uy. Kaniadto pang nag-eskuwela ta sa hayiskol. Naunhan lang ko ni Ramon. Best friend baya mi, you know that.”
“Pangita na lang og laing girl, Alfred.”
“Ikaw man ang akong gusto, Roxan. Wa man mopadayon sa pagpangulitawo si Ramon nimo. So isulti ko nimo ron nga love tika.”
Nakapangawot ko sa akong ulo. Sa akong paniid, wa magkumedya si Alfred.
“Haaayyy. Ikaw gud. Basta nakahibawo ka na nga daghan kog suitors ug nagsugod na kog pili nila kon kinsay akong sugton.”
“Anha na ko mohunong sa pagpangulitawo nimo, Roxan, kon duna ka nay uyab. But promise, love gyud tika.”
“Imo gyud nang ipanumpa nako, Alfred?”
“Oo, Roxan. Barogan nako ning akong giingon nimo karon.”
Wa na ko magtingog. Nasuta ko nga nagmatinud-anon si Alfred sa iyang gibati nako. Apan ang tanan nag-agad sa ipitik sa akong kasingkasing, kon kinsa sa akong mga suitors ang angay kong sugton.
“Samtang nia pa ko sa atong lugar, Roxan, every night mamisita ko nimo.”
“Aw, naa ra nimo, Alfred. Wa ta man ka did-i ana. Pero wa ni magpasabot nga gitagaan na tikag paglaom.”
Miyangu-yango si Alfred. Unya, nakatan-aw mi si Alfred sa gawas sa gate. Dunay lalaki nga nagtindog. Nakaila dayon ko niya, si Ramon.
“Hala, naa si Ramon. Mamisita gyud ni nako.”
Naingnan ko si Alfred. Daling mitindog si Alfred ug giduol si Ramon. Gipasagdan ko lang sila. naghangaop. Nagginaksanay pa gani sa gawas sa gate. Ingon sila ani kasuod. Dugay na sab silang wa magkita. Si Alfred na ang nagpasulod kang Ramon sa among lawn. Nagkatawa kong nagtan-aw nila.
Malipayon silang duha nga miduol nako. (SUMPAYAN))