DUTERTE NAA SA CEBU KARON, UGMA
Tulo ka mga kalihukan sa Sugbo ang bisitahon ni Presidente Rodrigo Duterte karong adlawa ug ugma.
Karong adlawa, mobisita si Duterte sa lungsod sa Alegria alang sa ceremonial commencement sa oil ug gas production sa Alegria Oil Field Polyard - 3 Wellsite sa Barangay Montpeller, Alegria.
Atol sa pagbisita ni Duterte sa alas 3 sa hapon karon sa Alegria, sugaton siya sa Assistant Country Manager sa China International Mining and Petroleum Company Ltd. nga si Edgar Benedict Cutiongco.
Anaa usab ang chairman sa CIMP nga si Lam Nam, Alegria Mayor Verna Magallon ug si Department of Energy Secretary Alfonso Cusi.
Human sa commencement, mobalik dayon si Duterte paingon sa dakbayan sa Sugbo alang sa opening sa Philippine National Games.
Moabot siya alas 5 karong hapon sa Cebu City Sports Center diin sugaton siya sa nagkadaiyang opisyal sa Philippine Sports Commission.
Lakip niini sila si William Butch Ramirez, PSC Chairman; Ramon Fernandez, PSC Commissioner; ug Department of Education Secretary Leonor Briones.
Ugma,atol sa kapyistahan sa lungsod sa Tabogon, motambong siya agig sanong sa iyang pag-umangkon sa pag-agawan nga si Mayor Zigfred Duterte.
Giingon nga aduna usay pribado nga dinner meeting ang Presidente sa mga mayor ug bise mayor sa Sugbo karong gabii sa Waterfront Hotel & Casino sa Lahug, Cebu City.