RUSSIAN ‘MIABUSO’ OG 6 KA MENOR, GIDAKOP
5, 8, 9. 11, 12, 16 ANYOS NALUWAS
■NADAKPAN. Ang Russian nga si Dmitri Nikuli (tunga) gidakop sa kapulisan sa lungsod sa Consolacion, Sugbo sud sa iyang balay sa usa ka subdivision sa Barangay Lamac sa mao nga lungsod tungod sa giingong pagmolestya og mga menor. Siya gidakop sa team ni SPO2 Marjorie B. Paller sa Consolacion Police Station-Women and Children’s Protection Desk. Estorya sa pahina 2.
Russian national gidakop human giingon nga nimolestya sa unom ka mga menor de edad, lima kanila nga bata nga na-rescue usab sa kapulisan kagahapon sa ala 1 sa kaadlawon sa Barangay Lamac, lungsod sa Consolacion, Cebu.
Si Dmitri Nikuli, 45, temporaryong nagpuyo sa usa ka subdivision sa Barangay Lamac, naabtan sa kapulisan uban sa mga menor nga nag-edad og 5, 8, 9, 11, 12 ug 16 anyos.
Ang mga bata, uban sa ilang ginikanan, diha na magpuyo sa balay sa langyaw sukad sila gidapit niini.
Ang mga biktima nasunogan sa ilang balay sa dakbayan sa Mandaue sa miaging tuig.
Si SPO2 Marjorie Paller, chief sa Women and Protection’s Desk sa Consolacion Police Station nga nahinabi sa Superbalita Cebu, nagkanayon nga gisikop nila si Nikuli human nireklamo ang inahan sa 9 anyos nga biktima inaba- gan sa social worker.
Ang inahan sa biktimang 9 anyos nangayog panabang human nisinggit ang bata samtang didto sa second floor.
Ang ginikanan sa mga bata uban sa ilang pamilya gipapuyo sa langyaw sa mao nga balay human sila nasunogan sa ilang balay sa Barangay Subangdaku, dakbayan sa Mandaue niadtong miaging tuig.
Matod ni Paller nga gihigala ni Nikuli ang mga bata pinaagi sa pagbisita sa dapit nga nasunogan sa miaging tuig.
Dinhi nagsugod sa pag-imbetar kanila si Nikuli sa ilang balay.
Ang inahan nibutyag nga samtang nagluto siya sa miaging gabii, nisinggit ang iyang anak sa ikaduhang andana.
Sa iyang pagsaka, hubo na ang bata samtang ang langyaw mikanaog.
“Giligo daw ang bata sa langyaw. Mao lagi, dugay na, pirme hikaphikapon iyang pribadong lawas,” dugang ni SPO2 Paller.
Apan si Nikuli hugtanong nanghimakak sa pasangil batok niya.
Sa pag-abot sa kapulisan sa panimalay niini, na-rescue sab ang uban pang mga bata kinsa ningreklamo sab nga gimolestiya.
Nahibaw-an nga mag-ulian ang langyaw sa Russia ug sa miaging buwan lang nabalik dinhi sa Pilipinas.
Mga kasong rape, child abuse ug human trafficking ang atubangon ni Nikuli. /