Abella moasumer sa 'una' niyang termino isip kapitan

Tungod sa kamatayon ni barangay captain-elect Joel Ycong, si incumbent Duljo Fatima Barangay Captain Elmer Abella, kinsa napili nga number 1 councilor sa bag-ohay lang nga eleksyon, moasumer sa pagkakapitan base sa rule of succession nga nalatid sa Local Government Code of 1991.

Sa interbyu sa Superbalita Cebu, ang officer-in-charge sa Department of Interior and Local Government (DILG) sa Cebu City nga si Emma Joyevelyn Calvo nipasabot nga si Abella, bisan naa na unta sa ikatulo ug katapusan niyang termino, mao gihapon ang mahimong barangay kapitan sa Duljo Fatima.

“Siyay (Abella) mopuli as kapitan, siyay molingkod kay mo-follow man ta sa rule of succession. Murag fresh nga mandate. Kapitan pa man na si Abella until June pa man na iyaha (termino), so continue siya as kapitan,”pasabot ni Calvo.

Sigon ni Calvo nga mao kini ang labing permiro nga nahitabo sa iyang nahinumdoman nga ma-fresh ang mandate sa usa ka kandidato nga nahuman na ang termino tungod sa kamatayon sa napiling opisyal.

Kining giingon nga fresh nga mandate nagpasabot nga ang lingkuran ni Abella karong Hunyo 30 sa hapon, maihap na nga labing una niya nga termino.

Sa sunod nga eleksyon sa barangay, mahimo gihapon nga makapapili si Abella sa samang posisyon. Sa pag-obserbar niining rule of succession, makabakante usab ang usa ka posisyon sa kagawad hinungdan nga dunay ipuli.

“Mo-follow man gud ta (sa) rule of succession. Di ba naay bakante na diri sa ubos? Ang council na maoy mo recommend ngadto ni Mayor (Tomas Osmeña) kon kinsay ilahang ipuli,” asoy ni Calvo.

Sa iyang bahin nipadayag si Abella nga nagsagol ang iyang gibati ning nahitabo karon.

“Para nako, mura kog nalipay sa akong kaugalingon, pero naguol sad ko tungod kay ang nadisgrasya gud nga namatay, kauban sad nako diri sa barangay si konsehal Joel Ycong. Wa gyod ko magdahom nga nahitabo ni niya gani. Usa sad, wa sad ko magdahom nga ako say mapuli,” sulti ni Abella sa Superbalita Cebu.