Election officer sa Lapu nangayo og pagsabot ngadto sa teachers
Nangayo og pagsabot ang election officer sa dakbayan sa Lapu-Lapu human gireklamo sa mga magtutudlo sa kahinay sa pagpanghatag sa honorarium sa mga nagsilbing Board of Election Tellers (BET) sa nilabayng barangay ug Sangguniang Kabataan (SK) Elections.
Kagahapon, nagdasok gawas sa buhatan sa Commission on Elections (Comelec) ang mga magtutudlo gikan sa mga island ug mainland barangays sa dakbayan kinsa naghinamhinam na nga makadawat sa ilang honorarium.
Niadtong Huwebes sa gabie pa nagpundo ang ubang mga magtutudlo gawas sa Comelec tungod kay buot nilang makuha dayon ang bayad sa ilang hinaguan sa pinilay niadtong Lunes, ang uban nila didto na natug aron lang mag-una sa hatagan sa cash cards.
“Wa man sad koy tug nanghatag man sad ko diri. Wa man gani ko mouli aron ma-accommodate sila. Naa naman gud sila niya kung imong balibaran, masuko baya na. Mao tong akong gi-cater to extent nga kinsa lay maabot,” matod ni Atty. Janeth Lamban, election officer sa dakbayan sa dihang nahinabi sa Superbalita Cebu kagahapon.
Dugang niya nga wa pa siyay tulog uban sa unom niya ka mga kawani sukad niadtong Huwebes aron lang mahatagan sa honorarium ang halos 2 mil ka mga magtutudlo nga nagsilbi isip BET.
Giklaro ni Lamban nga ang nahitabo niadtong Huwebes, nihangyo siyas mga nagdasok nga magtutudlo sa ilang buhatan nga mopahuway una siya ug iyang mga kawani pagalas 5 sa hapon apan nangasuko ang mga magtutudlo sanglit di sila gusto mopaabot og alas 8 sa gabii, ang gusto nila nga ipadayon ang releasing sa cash cards.
“Niya di naman tawon na kaya sa atong lawas ang more than 24 hours (nga paglihok). Nangayo lang unta mi og pagsabot niya nasuko sila nganong nadugay kuno. Ang ako is mosabot unta sila na akong staff mopahuway pud. To think we give the time 24 hours to cater them para mahatag ang cash cards,” matod ni Lamban ning mantalaan.
Kagahapon, sobra na sa 24 oras nga nagserbisyo si Lamban uban sa iyang 6 ka mga kawani.
Di sama sa nilabayng mga piniliay, wa gi-schedule sa Comelec ang pagpanghatag karon tungod kay ang mando sa kadagkuan sa Comelec nga ihatag dayon ang cash cards.
Atol ning pagsuwat, kapin sa usa ka libo na ang nahatagan sa cash cards sa ComelecLapu-Lapu.
Gipahibalo sab ni Lamban ang mga magtutudlo nga kutob ra sila sa alas 5 sa hapon kagahapon ug ang di mahatagan, makadungog og pahimangno ni Dr. Marilyn Andales, schools division superintendent kon kanus-a ma-release ilang honorarium tungod kay making-alayon ang Comelec sa scheduling sa pagpanghatag nga possibleng ipaagi og matag tunghaan ang pag-release.
“Mas maayo nga through school ang pamaagi nila nga idessiminate sa among school superintendent para ang mga teachers sa isla ug island barangay di na bitaw mahasol nga maglinya tawon diri kay luoy kaayo,” ni Bienvenido Sibug, BET gikan sa Basak Night High School.
“Ang hasol kaayo mao ang waste of time, waste of money, waste of energy imbes nga magbuhat tas buhatonon sa balay. Walay pahuway,” dugang niya.
Ubos sa probisyon sa Comelec, kinahanglang ihatag sa mga BET ang ilang mga honorarium sud sa 15 ka adlaw.
Ang mga bag-ong napili nga SK madasigon sa ilang pagka sa posisyon uban sa mga konsehal sa barangay.