Mga Radaza nanawagan og kahiusahan
Giawhag nila ni Lapu-Lapu City Mayor Paz Radaza ug anak niining si Kongresista Aileen Radaza ang mga bag-ong napiling opisyal sa barangay ug Sangguniang Kabataan (SK) sa dakbayan nga maghiusa sa pagserbisyo sa katawhan atol sa oathtaking ceremony sa mga opisyal sa Mactan Island Convention Center kagahapon sa buntag.
Moabot ngadto sa 469 ka mga barangay ug SK officials gikan sa 30 ka mga barangay sa dakbayan ang nitambong sa maong seremonyas.
Wa nitambong niini ang 11 ka mga napiling opisyal sa Barangay Pajo.
Sa iyang speech, si Mayor Radaza niingon nga panahon na nga magkahiusa ang mga opisyal aron mas maayong maserbis-
yuhan ang mga Oponganon karon nga human na ang piniliay.
“Set aside political differences and focus on the betterment and development of your people and your barangay. After all, that is the main reason why all of us are here today. Be our partner in good governance. Be our partner in bringing about positive change in Lapu-Lapu City,” hangyo ni Paz sa mga napiling opisyal. Nanghinaot ang mayor nga mahimong matinud-anon ug sinsero ang panerbisyo sa mga napiling opisyal sa dakbayan.
Gawas niini, si Radaza niingon nga angayang siguraduon sa mga opisyal ang maka-ayo ang mga programa ug proyekto sa ilang mga konstitwente, nga ang ilang mga kaayuhan kanunayng mag-una sa di pa ang mga personal nga interes.
“Ang kaayohan sa atong katawhan ang ipatigbabaw sa higayon nga kamo magpanday ug mga programa sa inyong tagsa tagsa ka barangay. Matag usa kaninyo gihatagan ug mandato sa katawhan nga modumala sa pang-barangay nga kagamhanan. Gihatagan kamo sa ilang suporta ug pagsalig, ayaw kini pakyasa,” ni Radaza.
Sa iyang bahin, si Kong. Radaza nipasalig ang iyang ipadayon ang iyang pagsuporta sa tanang barangay sa dakbayan sa Lapu-Lapu.
Gipasalig niya nga siya pabiling tulay ngadto sa national
government ug dad-on niya ang mga yangungo sa mga barangay nga nanginahanglan og atensyon sa national government.
"Diha lang sa atong panaghiusa kusog nga atong malampasan ang bisan unsang pagsuway nga mahimong sagabal sa kadaugan sa atong kalambuan. Sa panaghiusa kanunay nga atong matagamtang ang kadaugan sa Mactan,” ni Kong. Radaza ngadto sa mga nanumpa nga mga opisyal.