Pagpanghaylo ni Tomas

Pipila ka adlaw human modaog sa piniliay, ang mga bagong napiling Sangguniang Kabataan (SK) officials sa dakbayan sa Sugbo nakadawat gilayon sila og mga maanindot nga saad gikan ni Cebu City Mayor Tomas Osmeña. Sa mass oathtaking ceremony sa Cebu Institute of Technology-University diin siya maoy mipahurar sa mga mananaog, si Osmeña misaad nga iyang hatagan og cash honorarium ug scholarship grant ang mga bag-ong SK officials.

Hinuon iya kining ipaagi sa konseho aron tukion una og maayo sa dili pa maaprobahan. Tinuon usab nila kon wala ba kini makasupak sa lagda sa Commission on Audit (COA).

Nindot ang maong laraw sa mayor kay makapadasig kini sa mga batan-on kinsa maoy giingong paglaom sa atong nasod. Hinaot nga mahinayon ni.

Pero, yuna ra. Daw sa makapaduda ang timing pagpahibawo ni Osmeña niini. Kini tungod kay bisan tuod og mahuman na ang SK Election niadtong Mayo 14, aduna pa silay umaabot nga piniliay kon kinsa sa kanila ang mamahimong presidente sa ilang federation pipila ka adlaw gikan karon.

Kon kinsa ang mapili, siya maoy molingkod isip ex-officio sa konseho sa dakbayan sa Sugbo. Ang iyang gahom susama ra usab sa usa ka konsehal sa dakbayan.

Di kaha stratehiya ni Osmeña ang iyang pagsaad ngadto sa mga SK officials aron kini adto permi modapig kaniya? Kana bang giingon nila nga gilansangan nang daan aron dili mausab ang baruganan ug di na motapon sa laing grupo.

Dili nato ikalimod nga target karon ni Osmeña nga makuha ang mayoriya sa konseho aron wa nay makababag sa iyang mga tinguha.

Sa pagkakaron gud, ang oposisyon maoy mayoriya 9-8, apil na niini ang boto ni vice mayor Edgardo Labella, nga maoy mobuak sa panagtabla.

So kon anaa kaniya ang SK, makuha na niya ang mayoriya. Kini wa pay labot sa molingkod unya pagka president sa ABC.