Makadaot kung kanunayon

Kitang mga babaye, dunay mga naandang inadlaw nga tulumanon paglimpyo sa kaugalingon gikan sa pag toothbrush, shampoo, gamit og mga exfoliating creams ug sunscreens, sul-ob og limpyong sinena ug pahumot para hinlo tan-awon.

Apan kahibalo ka ba nga kining mga inadlaw natong mga gipang-gamit makadaot kung kanunayon?

Pananglitan, ang paggamit og sabon (ordinaryo o branded) o feminine wash paglimpyo sa kinatawo. Kini dunay mga sagol nga isog nga mga kemikal nga maka-hinlo ug maka-pahumot apan kung kini kanunayon, makadaot sab sa balansi sa iyang natural nga pH. Ang pag-gamit og presko ug katamtamang tubig insakto na kay ang atong lawas duna may natural nga mekanismo sa paglimpyo.

Sunod kining tibuok adlaw nga paggamit og panty shield, sanitary napkin ug diaper. Kinahanglan kining ilisan bisag ka tulo sa usa ka adlaw aron malikayan ang impeksyon nga dala sa mga organismo.

Pagsul-ob og bra nga pushup o may underwire. Mao kini maka-ingon sa katol-katol, fungus sa suso, hyper pigmentation og pagbara sa sirkulasyon sa dugo. Mahimo kining sul-ubon panagsa sama sa mga espisyal nga okasyon apan di maayong pirmihon. Angay sab paginhawa-on ang suso. Ang mas maayong isulob kadtong bra nga di hugot, di piit og di luag.

Di sab maayong matulog nga mag-bra kay posibli kining makadaot sa breast tissues, unya ang hook ini maka irita og bun-og sab sa panit. Hasta ang unod ug ugat-ugat labi na sa may ilokan ma apektuhan kay di naman ka lahos dayon ang daloy sa dugo tungod sa ka piit.

Tungod kay di man lagi kini pirming makita, usahay makalimtan na lang sab og limpyo. Angay kining ilisan ug labhan ka usa kada semana.

Ang pagsul-ob og underwear nga jersey mas makabu-ot labi na kung panington. Mao kini usa sa mga rason sa hubag-hubag. Mas maayo ang cotton nga klase sa panty ang gamiton.

Sa katapusan, angay mag sul-ob og scarf, bandana o payong kung naa sa gawas kay proteksyon kini sa ultra-violet rays sa adlaw nga maka sunog, sunburn ug skin cancer.