Gisuwerte ang taga buwakan
Nakabasa na siguro mo o naka adto na sa Buwakan ni Alejandra nga nahimutang sa bukirang barangay sa Gaas sakop sa lungsod sa Balamban.
Sa mga nakabisita na basin nahimamat na ninyo ang usa sa mga guide didto nga ang pangalan si Vincent o Inting. Kadto bitaw’ng guide nga alegre kaayo kay kung imong pamalihugon pag picture gamit ang camera o cellphone apilan sab niya ug ginagmay’ng comedy pinaagi sa paghiwihiwi sa iyang baba mao nga makakatawa ka.Unya mosiyagit dayon siya ug ismayel.
Nahibalo ba mo nga wa gyud tuyo-a nga si Inting ron maoy SK Chairman sa Barangay Gaas bisan kung wa siya modagan sa maong posisyon?
Ang estorya ingon ani. Si Inting nga ang tinuod nga pangalan Vicente Villasante nidagan pagka SK Councilor ubos sa grupo ni Andres Habasa nga maoy ilang kandidato pagkaSK Chairman. Tayming kaayo nga way niparang sa ilang grupo mao nga nanaug silang tanan.
Human sa piniliay niadtong Lunes, si Inting nag-una. Niadtong Miyerkules sa hapon naabtan man si Habasa ug disqualification order gikan sa Comelec sa rason nga siya subra na sa edad. Gumikan niini si Inting isip number one councilor automatic maoy manumpa nga SK Chairman hulip kang Habasa.
Akong gipakigkitaan ang duha ka batan-on didto sa Gaas niadtong Huwebes. Gipakita ni Habasa ang disqualification order sa Comelec. Siya nangatarungan nga dihang ni file siya sa iyang certificate
of candidacy iyaha na nga gisultian ang Comelec sa Balamban nga karong Agusto 31 pa siya motangkod nga 25 anyos. Sa ato pa sa election niadtong Lunes, 24 anyos pa siya hangtod karon.
Hinuon matod niya iyang tumanon ang order sa way daghang langas ug giila niya si Inting nga maoy mopuli sa iyang dapit. Si re-elected Barangay Capt. William Genel nga akong gikuhaan sa iyang
reaction niingon nga naanugnan siya kang Habasa nga iyang gihulagway nga buotan. Matod niya may leksiyon nga nakat-onan sa maong kasinatian ug niila kang Inting nga maoy kuwalipikado.
Akong nasayran nga si Habasa usa ka certified electrician nga nadistino sa ilang barangay. Samtang si Inting gawas nga guide sa buwakan usa sab ka katikista. Sa wa pa ko nibiya nisaad si Inting pagpadayon sa mga plano ni Habasa.
Ug si Habasa nisaad sab nga mopadayon sa pagserbisyo sa barangay bisan kung di na siya usa ka opisyal. Ang sikat nga guide sa buwakan wa damha nga nahimong SK Chairman bisan kung di ni mao ang posisyon nga iyang gidaganan.