Once there was a promise
Nagtapad ming tulo paglingkod sa lingkoranang kawayan. Nagpaminaw lang ko kanilang Alfred ug Ramon nga malipayon gyud sa ilang panagkita karon.
“Matay, Al, kawa’a gyud nako magdahom nga nia ka na diay sa Cebu. Nagtuo gyud ko nga tua ka sa Davao.”
“Nindot man gyud ang ato, Mon. Wa lang gyud ko kalugar sa pag-anhi dayon aron magkakita tang tulo si Roxan.”
Mitan-aw nako ang duha. Gipahiyoman ko sila.
“Bitaw sab, uy. Kon wa pay eleksiyon, di gyud tingali ka moanhi, Alfred.” Mitingog ko.
Namatikdan ko si Ramon nga seryusong nagtan-aw nako.
“Moanhi gihapon. Wa man gani ko mopauli sa Davao bisag summer vacation na.”
“Kining, Roxan, may nang nia si Alfred aron maoy motestigos.”
“Ha? Testigos? Kay ngano man?” Nakalitan ko sa gisulti ni Ramon.
“Kining gugma, uy. tinuod gyud nga di pangitaon. Motungha lang nga di mahibaw-an. Wa ko mopadayon sa pagpangulitawo nimo kaniadto kay di ko gustong manumpa bahin sa akong love nimo. Gusto man gud ka nga ipanumpa ko ang akong pagmahal nimo sa imong atubangan.”
Nagkatinan-away mi si Alfred.
“Pero karon, ipanumpa ko sa imong atubangan nga love gyud tika, Roxan. Nasuta ko na karon nga true love ang gibati ko nimo.”
“Kining, Mon, morag kalit man kaayo ning imong pagbalik sa pagpangulitwo nako?” Seryuso kaayo ko. “Nagtuo na man gud ko nga duwa-duwa lang ang imong gibati nako.”
“Angkunon ko nga nahimo kong talawan kaniadto, Roxan. Pero karon isaad ko nimo nga way laing girl nga akong higugmaon kondi ikaw lang.”
Nasuta ko nga seryuso na gyud si Ramon sa iyang pagpangulitawo nako ron. Natugkad ko kini sa iyang nawong, sa iyang mga mata ug sa iyang mga pulong.
“Di pa ko katubag anang imong tuyo nako, Mon.. You know, daghan na kog suitors ron. Nuon, wa pa koy uyab. Mamili pa ko. Mag-agad ko sa pinitik sa akong kasingkasing.”
Giprangkahan ko si Ramon. Mipasiplat ko kang Alfred. Naghilom lang gyud siya. Apan nagsige siyag tan-aw nako.
“Nakahibawo ko ana, Roxan. Unta, tagaan mog kaseryuso ang akong pagmahal nimo.” Mitindog si Alfred. “Kining, aron magkaestorya mo pag-ayo, mopauli na ko.”
Apan sa wa pa molakaw si Alfred, gipangayoan siya ni Ramon sa number sa iyang selpon.
(SUMPAYAN)