NIETES-PALICTE FIGHT ANHI SA CEBU

Giklaro sa ALA Promotions nga ipahigayon karong Agusto 18 sa Sugbo ang pagpakigharong ni longest-reigning Filipino boxing world champion Donnie ‘Ahas’ Nietes batok sa kababayang si Aston Palicte alang sa inilugay sa bakanteng World Boxing Organization (WBO) super flyweight title.

“We have a done deal but we haven’t signed the contracts yet because there’s still minor details we have to see in and out, but it’s going to be August 18. Cebu City,” matod ni ALA Promotions president Michael Aldeguer sa interbyu sa ABS-CBN News.

Ang trainer nga si Edmund Villamor, kinsa kasamtangang naggiya ni Nietes sa training niini sa Amerika, mikompirmar niini ug matod niya nga nagkasulti na sila ni Aldeguer kabahin niini.

“Mao may ingon ni sir Mike nga August 18 sa Cebu. Basta kami, mag-train lang gyud mi’g sakto diri,’ matod ni Villamor.

Sa kasaysayan, mao pa lang unya kini ang ikatulong higayon nga duha ka Pinoyng mga boksidor ang magsangka alang sa usa ka world title fight.

Karong Mayo 26, ang stablemate ni Nietes nga si Jonas Sultan mosuway pag-ilog sa korona sa kababayang si International Boxing Federation (IBF) super flyweight king Jerwin Ancajas sa Fresco, California.

Ang labing unang higayon nga nag-unay ang duha ka mga Pinoy sa usa ka world title fight nahitabo niadto pang 1925.

Si Nietes, 36, kinsa lumad nga taga Murcia, Negros Occidental, naggunit og 41-1-4, 23 KOs nga rekord.

Samtang si Palicte, 27, kinsa lumad nga taga Bago City, Negros Occidental, naghupot og 24-2, 20KOs nga baraha.