DUTERTE MAOY MOABLI SA PNG
Pacquiao, ubang mga inilang atleta motambong sab
Presidente Rodrigo Roa Duterte moabot karong adlawa dinhi sa Sugbo isip pinasidunggang dinapit sa opening ceremony sa 2018 Philippine National Games (PNG) nga ipahigayon diha sa Cebu City Sports Center (CCSC).
Gawas sa presidente, motambong usab si eight-time division champion ug senador Manny Pacquiao, ingon man mga kanhi ug kasamtangang Olympians sa nasod.
Kini sama nila ni Roel ug Manuel “Onyok” Velasco sa boxing, Bong Coo sa bowling, Dianggo Bustamante sa billiard, Hidylyn Diaz sa weightlifting, Elma Muros Posadas sa track and field, Congressman Mansour del Rosario sa taekwondo ug Eugene Torre sa chess.
Usa ka grandiyusong presentasyon ang gitagana nga maoy modayandayan sa opening ceremony.
Si Ricky Ballesteros sa Cebu City Sports Commission (CCSC) mibutyag nga maanindot ug masanagon nga presentasyon ang ilang gitagana sanglit gusto kini nilang himuong makasaysayon nga kalihukan sa dakbayan.
Ang kalihukan sugdan alas 3 sa hapon sa usa ka parade nga magagikan sa Department of Health-7 dalan Osmena Blvd. ug motapos sa CCSC.
Sa alas 5 sa hapon himoon ang lighting of Urn of Peace and Unity nga panguluhan ni Commissioner Ramon Fernandez sa Philippine Sports Commission (PSC) uban sa mga Sports Heroes ug mga umaabot nga Olympians sa Philippine Sports.
Human niini, mosunod gilayon sa pagpadungog sa iyang mensahi ug pagdeklara sa pag-abli sa 2018 PNG nga himoon sa presidente.
Ang maong kalihukan tambungan usab nila ni Cebu City Mayor Tomas Osmena, Cebu Governor Hilario Davide III, PSC Chairman William “Butch” Fernandez ug 2017 Olympics silver medalist Hidilyn Diaz.
Dul-an sa 3,000 ka mga atheleta gikan sa mga local government unit (LGU) sa Luzon, Visayas ug Mindanao ang magtigi para sa 2,578 ka medalya.
Sa Mayo 20 na pormal nga sugdan ang panagtigi sa mga nagkadiyang mga events nga motapos sa Mayo 25./