Nganong Osmena wa imbitaha sa presidente?

So, tulo ka mga mayor sa Sugbo ang wala imbitara ni Presidente Rodrigo Duterte sa iyang pagbisita dinhi sa Sugbo niadtong Sabado sa usa ka private dinner sa Cebu City Waterfront Hotel and Casino. Ang tulo mao sila si Cebu City Mayor Tomas Osmeña, Ronda Mayor Mariano Blanco III ug Daanbantayan Mayor Vicente Loot.

Nag-unang rason kon nganong wala pangimbitar kining maong mga mayor ilabi na sila si Loot ug Blanco III mao ang pagkabaniog niini sa pagkalambigit sa gidiling drugas.

Pero sa tulo, si Osmeña ra ang bugtong wa imbitara nga dili ang pagkalambigit sa gidiling drugas ang hinungdan.

Dunay mga pagduda nga ang grupo ni Michael Dino, ang pangulo sa Office of the Presidential Assitant for the Visayas, maoy nagmaniobra niini ilabi na kay sila maoy nagpasiugda sa kalihukan.

Kining maong mga pagduda di malikayan tungod kay di man sab malimod ug gani naladlad na sa publiko kining grabi karon nga panagbangi tali ni Dino ug ni Osmeña.

Posibli nga dunay kamatuoran kining maong pagduda. Pero unsa kini ka tinuod nga pipila pa ka adlaw sa wa pa mobisita sa Sugbo ang presidente, aduna na diay kini marching order ngadto sa iyang mga tawo nga di kini gustong makighimamat ug dili ipaimbitar si Osmeña sa dinner party.

Matod pa sa tinubdan nga mao ni hinungdan nga sa sitting arrangement lang daan sa stage sa opening sa Philippine National Games (PNG) diin ang Cebu City maoy host, mediyo nalayo si Osmeña sa gilingkuran ni Duterte.

Dugang sa tinubdan, nga dili ang panagbikil ni Dino ug Osmeña ang rason nganong ang presidente gustong modestansiya sa mayor kon dili ang pagka-loyal diay ni Osmeña ngadto ni Roxas nga nakita ni Duterte sa niaging Presidential election.