Napiling barangay kapitan sa Day-as mibalhin sa BOPK

Pipila ka mga bag-ong Barangay ug Sangguniang Kabataan officials sa Brgy. Day-as nanumpa kagahapon sa Mayor’s Office nga gipangulohan ni Mayor Tommy Osmeña isip parte sa Bando Osmeña Pundok Kauswagan (BOPK).

Si Brgy.Captain-elect Freddie Torres Esmas ang nakadaog sa piniliay sa maong barangay.

Siya miyembro kaniadto sa Team Rama nga gipangulohan ni kanhi Mayor Michael Rama.

Nisaysay si Esmas nga nibalhin siya ang interes sa mga taga Day-as anaa sa BOPK.

Matod usab niya nga lisod alang kaniya nga mohimog desisyon, apan wa siya nidagan alang sa iyang kaugalingon kon di sa “best interest” sa barangay.

Naghinam-hinam napud siya nga makaserbisyo og balik sa Barangay Day-as.

Nakig-estorya ug nananghid si Esmas kuyog ang iyang mga konsehal ngadto kang Bise Mayor Edgardo Labella.

“Of course niistorya ta kay bati man kaayo og kuan… I have to make a very hard decision and the bottom line is ‘best interest again’ of my barangay,” dugang ni Esmas.

Gitubag usab ni Esmas ang pangutana kon wa ba masuko kaniya ang pikas grupo.

Nibutyag siya nga di kini kalikayan ug siya mismo naikog apan bisan kon lisod, kinahanglan mohatag siya sa iyang desisyon bahin niini.

Samtang sa mga SK councilors, lima lamang ang nitunga ug lakip sa wa nipatim-aw ang SK chairman sa barangay Day-as nga si Febie Pacheco nga giingong wa pa makadesisyon kon mobalhin ba sa BOPK.

Niingon si Esmas nga iya pang estoryahon ang iyang laing SK members, apan iyang gidala ang uban nga mga Sk councilors kagahapon alang sa pagpanumpa.

ARNI ACLAO MIBALHIN: Si Cebu City Mayor Tomas Osmeña (wala) mao ang nangulo sa pagpanumpa nila ni Day-as Barangay Captain-elect Freddie Esmas ug mga konsehal nga sila si Carmencita Entoma, Regalado Hisoler, Jr. ug Benigno “Ekin” Caniga, Jr. sud sa iyang buhatan. /