Maestra nga naputla’g tiil wa mawad-i sa paglaom

Nipadayag sa iyang pagkamapasalamaton ngadto kang Cebu City Mayor Tomas Osmeña ang usa ka public school teacher sa tabang nga iyang nadawat human sa iyang aksidente niadtong miaging tuig.

Si Morishka Nicole Uy naaksidente sa niadtong miaging tuig nga niresulta sa pagkaputol sa toong bahin sa iyang tiil. Si Uy usa ka grade six public school teacher sa Don Vicente Rama Memorial National High School ug bag-uhay lamang nibalik sa pagtudlo Enero niining tuiga.

“I was on my way to a seminar then niagi mi sa SRP, last year July. So there was a collision of vehicles. Nilupad ko so naligsan akong right leg so kailangan i-amputate kay serious man ang complications,” saysay ni Uy.

Matod usab niya nga dili sayon ang iyang sitwasyon karon apan wala kini nahimong babag sa iyang pagpadayon sa kinabuhi.

Wala siya mawad-i og paglaom kay adunay mga tawo nga dako ang suporta ngadto kaniya. Gihimo usab niyang inspirasyon ang iyang pagtudlo.

“It’s part of the therapy nga you’re in the teaching field, mag-atubang ka sa mga bata, maka-inspire ka but dili ka aware nga naka-inspire ka,” asoy ni Uy.

Dako ang pagtuo ni Uy nga importante nga siya nakarepresenta sa PWDs. Ganahan siyang mapahibaw ang katawhan kung unsa ang kaya nilang buhaton bisan sa ilang kahimtang.

Si Cebu City Mayor Tomas Osmeña nagkanayon nga ingon niini ang mga tawo nga iyang gipangita nga mahatagan og posisyon sa city office tungod kay nagsilbi siyang modelo sa kabatan-onan.

Matod ni Osmeña nga dili hinungdanon nga sikat o ilado ang usa ka tawo aron siya makaangkon og usa ka posisyon.

Ang importante mao ang paghatag og serbisyo sa katawhan.