GUN BAN GILIBKAS NA
Gilibkas na sa kapulisan ang gun ban sa Commission on Election (Comelec) lakip na ang pagpahigayon og mga check points human mapupos kagahapon sa tungang gabii ang election period.
Mokabat ngadto sa gatusan ka mga armas ang nakompiskar atol sa pagpatuman sa gun ban sugod niadtong Abril 14.
Gihulagway sa Police Regional Office 7 nga malampuson ang kapulisan sa ilang pagpatuman sa Comelec gun ban.
Sa talaan nga gipakita sa PRO-7 nakasakmit sila og 111 ka mga armas, 57 ka mahait nga hinagiban, 477 ka mga bala ug mga replica nga apil sa gidili sa balaod.
Sa 111 ka mga armas nga nakuha, 50 niini ang wala ma-renew ang lisensya, 71 ang loose firearms samtang 18 ang improvised nga mga armas.
“Bisan sa gun ban nga atung gipatuman nagpasabot ni nga naa gyud gihapo’y magdala og armas,” matod ni Supt. Reyman Tolentin.
Sa paglibkas sa gun ban mahimo na nga mapagawas ang mga armas nga adunay lisensya ug adunay permit to carry outside residence.
Hinuon walay natala ang PRO 7 sa mga insidente nga may kalabotan ang Barangay ug SK election.
Cebu Provincial Comelec nihulagway nga generally peaceful ang kinatibuk-ang election period diin kapin sa 4 mil ka mga Comelec checkpoints ang napahigayon apan kapin lang sa 10 sa mga nasakmitan og armas ang napasakaan ug kasong kalapasan sa election gun ban.
Sa talaan sa Cebu Provincial Comelec, moabot sa 4,085 ang napahigayon nga checkpoints.
Anaa lang hinuon sa 51 ka mga indibidwal ang nasikop sa maong mga checkpoint, 23 ka mga armas ang nasakmit ug 13 lang usab ang hingpit nga napasakaan og kasong kalapasan sa election gun ban.
“Naa man gu’y naaresto sulod sa balay, dili man na gun ban. Lahi man na, illegal possession (of firearms) ra man na. In public places ra baya ang gun ban. Ang among gikuha ra, is kanang violation sa Comelec gun ban,” pasabot ni Lionel Castillano sa Comelec.
Gipasabot niya nga ang mga pagpamusil nga nahitabo, sama sa pag-ambush sa convoy ni Daanbantayan
Mayor Vicente Loot, wala pa gyud matumbok nga may kalambigitan ba kini sa piniliay, hinungdan nga wa kini gikonsiderar nga lakip sa mga election-related violence.
“Although naay gitawag ug violent incident, it cannot be attributed gyud nga election-related. During election day, wala ma’y nakita nato nga nahitabo nga nagkagubot o naay namatay. Walay kandidato nga namatay, ” niingon si Castillano Sa laing bahin, pahinumdom karon sa Comelec sa tanang nikandidato sa barangy ug Sk elections nga moduso sa ilang Statement of Contributions and Expenditures ngadto sa mga local nga buhatan sa Comelec hangtud sa Hunyo 13.