Bayranan sa eskuwelahan mosaka

Sa pag-abli sa klase karong Agusto, nalantawan ni Kate Denolang, 18, umaabot tinun-an sa 4th year sa kursong Bachelor of Arts in Communication major in Media Communication sa Saint Theresa’s College of Cebu, dakbayan sa Sugbo, nga mosaka na usab ang bayrunon sa ilang tunghaan.

Matod niya, niadtong Marso, gitigom sa ilang eskwelahan ang mga ginikanan ug student council ug gipahibawo sa laing umento sa tuition fee nga ipatuman sugod sa unang semester karong tuiga.

Moabot sa kapin P30,000 ang ilang bayranan sa usa ka semester labi na kon full load ang subjects sa estudyante.

Si Kate nisaysay nga tulo sila ka magsuon nga gipaeskwela sa ilang inahan nga si Josephine Denolang, siya nga naa sa kolehiyo ug duha niya ka mga manghod, mag Grade 7 ug mag Grade 3.

Hinungdan nga naluoy si Kate sa iyang inahan, kinsa nagtrabaho isip usa ka laboratory receptionist sa Mandaue City Hospital, sa dugang bayrunon na usab sa ilang eskwelahan.

“Pero ig ingon nako sa akong mama, tuition fee increase na sad, moingon ra man siya, “okay ra na, pangitaan ra na nato og paagi.” So, dili na lang sad ko maguol,” saysay ni Denolang.

Sa 158 ka higher education institutions sa Central Visayas, 29 lang ka mga kolehiyo ug unibersidad ang nipahibawo sa Commission on Higher Education (Ched) 7 nga mopausbaw sa ilang bayrunon sa pagsugod sa klase sa school year 2018 hangtod sa 2019 sa Hunyo o Agusto.

Apan daling giklaro ni Ched 7 Director Freddie Bernal nga dili pa kini ang pinal nga listahan sanglit kinahanglan pa kini og pagtugot sa ilang central office.

Memorandum Order No. 3 Series of 2012 sa Ched, 70 porsyento sa income gikan sa usbaw sa matrikula ug ubang bayrunon ang itagana alang sa sweldo sa mga magtutudlo ug non-teaching personnel; 20 porsyento sa maintenance ug pagpalambo sa ekipo, mga edipisyo ug ubang costs sa operations. / SCG