CEBU CITY PABILING GAUNA SA PNG '18

Mihagdaw og dugang gold medals ang Cebu City delegation kagahapon aron pahugtan ang ilang paghupot sa temporaryong liderato sa Philippine National Games sa Cebu City Sports Center.

Basi official medal tally nga gipagawas sa mga nag-organisar sa alas 2:30 sa hapon, ang Cebu City nakarehistro na og 15 ka gold, 18 ka silver ug 17 ka bronze medals sa kinatibuk-an.

Gawas sa pagpangharos sa Cebu City sa atheletics event diin nakakuha kini og pito ka gold medals, ang Niños nanghakot sab og mga bulawan sa swimming pinaagi nila ni Karen Mae Indaya ug Razel Cabajar.

Si Indaya midominar sa 200m backstroke junior samtang si Cabajar nipatigbabaw sa 50 meter butterfly.

Sila si Indaya ug Cabajar kauban sila si Justine Reign Garrido ug Micah Marie Dela Cerna nakalabni sab og gold medal sa 4x100 medley relay.

Mitunol sab og duha ka bulawan alang sa Cebu City sa weightlifters nga sila si Evangelito Dale Ceniza sa 56kg divison ug si Joefry Frasco sa 50-kg class nga gipahigayon sa Naga City.

Nihatag sab og laing gold medal alang sa Cebu City ang arnisadors nga sila si Jackie Tuada ug Dexter Bolambor, kinsa maoy naghari sa arnis doubles event.

Ang laing nakatunol og gold medal sa Cebu City mao si John Renee Mier, kinsa maoy nilampos sa Individual Time Trial sa cycling event nga gipahigayon sa dakbayan sa Danao.

Kasamtangang nagsunod sa Cebu City mao ang Baguio City nga adunay 9-12-11 goldsilver-bronze medal tally,

Sikit nga nagsunod sa Baguio City mao ang General Santos City nga adunay 9-12-10 medal tally.

Mikatkat sa ikaupat nga dapit ang Manila nga adunay 8-4-8 medal tally samtang ikalima ang Zamoboanga City nga adunay 8-1-4 card.

Ang Cebu Province nagbitay sa ika-25 nga dapit nga adunay 1-4-4 medal tally.

Unom ka sporting events ang gibasihan sa medal tally kagahapon ug kini ang arnis, athletics, cycling, judo, swimming ug weightlifting. /

/ ALEX BADAYOS GOLD: Sila si (L-R) Karen Mae Indaya, Justine Reign Garrido, Razel Cabajar, ug Micah Marie Dela Serna mao ang nakahatag og gold medal sa 4x100 swimming relay kagahapon sa PNG sa Cebu City Sports Center.

/ALEX BADAYOS ANGOL: Si Archel Marikit sa Cebu Province gisakay og wheelchair human naangol ang iyang wa nga tiil sa paglukso sa triple jump event sa senior division kagahapon sa PNG. Midaog si Marikit og bronze medal.