Ancajas inilog batok kang Sultan alang sa mga eksperto
MINNEAPOLIS – Sa mga eksperto sa boksing nga gikuhaan sa Sun.Star Superbalita Cebu sa ilang mga opinyon, migawas nga inilog si International Boxing Federation (IBF) super flyweight champion Jerwin “Pretty Boy” Ancajas sa nagkaduol nga depensa niini batok kang ALA fighter Jonas “Zorro” Sultan.
Si Omega Boxing Gym supervisor ug head trainer Julius Erving “Jinggoy” Junco sa Omega Pro Sports International miingon, “I think 5th round KO
(Jerwin). Ancajas is way more technical than Sultan, he has the height advantage too.”
Sa iyang bahin, si coach Brix Flores sa Rex Wakee Salud (RWS) gym mibutyag nga sa iyang tan-aw, modaog si Ancajas pinaagi sa desisyon.
“Ancajas ko by decision. Tanaw nako ligas ni nga duwa, pareho silang maayo. Naay
speed, power ug sakto sa condition. Nakabintaha si Ancajas sa experience,” asoy ni Flores.
Mao sab kini ang panahom ni kanhi World Boxing Federation (WBF) International referee ug respetadong sportswriter sa Iloilo City ug New York based Alex P. Vidal.
“Ancajas might win on points.
Sultan is durable and could last for 15 rounds,” matod ni Vidal.
Si PhilBoxing Editor Rene Bonsubre Jr. (MD) nagtuo nga modaog sab si Ancajas pinaagi sa desisyon apan giklaro ni Bonsubre nga aduna sa’y poruhan si Sultan.
“Mura’g decision ni padulong ni Jerwin pero naay chance si Sultan kay na upset niya si (Johnriel) Casimero. Bintaha si Jerwin sa championship fights.”
Ania ang ubang mga panahom: “Modaug si Jerwin ani duwaa by Decision or TKO kay
maayo mo adjust sa duwa si Ancajas ug naay knockout punch.”-- 10,000 BC gym trainer Rhasshied Bacus.
“Wala koy gilabanan sa duha, moabot na sa 12-round decision.”- Seth Tio-Big Yellow Boxing Gym hea trainer Christopher “Pingping” Tepora.
“Di ko ka predict ini kay pareha sila maayo unya naay mga kasingkasing pud nga moaway. Nindot ni nga duwa for sure.” – Australia based fighter Augusto Caesar Amonsot.
Kahinumdoman nga ang kanhi world champions nga sila si Gerry Peñalosa ug Rodel Mayol mibutyag nga sa ilang tan-aw, mas dako og poruhan si Ancajas nga midaog.
Ang makasaysayong away nila ni Ancajas (29-1-1, 20KO) ug Sultan (14-3-0, 9KO) gikatakda karong Mayo 27 (RP time) sa Fresno, California State, USA.