PBA All-Star sugdan karon

Magsangka karong alas 7:30 sa gabii ang Gilas Pilipinas ug Mindanao Selection sa pagsugod sa Philippine Basketball Association (PBA) All-Star Weekend sa Davao del Sur Coliseum sa Digos, Davao del Sur.

Ning higayuna, ang Mindanao Selection giyahan ni Ginebra Gin Kings coach Tim Cone.

Ang starters ni Cone mao sila si Scottie Thompson, Mark Barroca, Peter June Simon, Jio Jalalon, ug Mac Belo.

Mokompleto sa Mindanao Selection mao sila si Baser Amer, Cyrus Baguio, Sonny Thoss, Rafi Reavis, Poy Erram, RR Garcia, ug Carlo Lastimosa.

Ang Mindanao Selection maoy unang mosukod sa katakos sa Gilas Pilipinas nga hinayhinay nang nangandam alang sa dagkong international events sa umaabot.

Ang starters sa Gilas Pilipinas mao sila si June Mar Fajardo, Japeth Aguilar, Troy Rosario, Calvin Abueva, ug Terrence Romeo.

Ang ubang sakop sa Gilas mao sila si Carl Bryan Cruz, Gabe Norwood, Allein Maliksi, Matthew Wright, Roger Pogoy, Jayson Castro, ug rookie Kiefer Ravena.

Human sa kombati sa Digos, ang Gilas Pilipinas makigbatok sab sa Luzon Selection karong Mayo 25 sa Batangas City ug batok sa Visayas Selection karong Mayo 27 sa Iloilo City.

Sa dili pa ang panagsangka sa Mindanao Selection ug Gilas Pilipinas, ipahigayon ang Legends Shootout diin mopakita’g aksyon sila si Allan Caidic, Kenneth Duremdes, Peter Jun Simon ug Scottie Thompson.

Ning maong sangka, ikauban ni Caidic si Secretary Bong Go, ikauban ni Duremdes si Senayor Manny Pacquiao, ikauban ni Simon si Presidential son-in-law Mans Carpio samtang ikauban ni Thompson si Major Michael Sabsal.