KAGAHI’G ULO, WAY DISIPLINA
NAKASAMOT SA PROBLEMA SA TRAPIKO SA SENTRO SA MINGLA
Ang kagahi’g ulo ug kaway disiplina sa mga tawo ang usa sa dakong babag sa pagsulbad sa suliran sa trapiko sa lungsod sa Minglanilla.
Kagahapon sud sa tulo ka oras sugod alas 9:00 sa buntag, gihawanan sa hiniusang operasyon sa awtoridad ang nasudnong highway sa lungsod diin duha ka multicab, usa ka awto, ug 12 ka ambulant vendors ang gipapahawa sa mga sidewalk.
Apan paglabay sa pipila ka oras human sa operasyon, may mga sakyanan ang namalik og park sa daplin sa national highway nga gipahigayonan sa operasyon sa Minglanilla Traffic Command (Mitcom), uban si Municipal Engineer Jose Nacario, Department of Public Works and Highways (DPWH) ug Minglanilla Police Station.
Si Engr. Valrico Tomol, pangu sa Social, Environmental and Road Right-of-Way Unit sa Second Engineering District sa DPWH 7, niangkon nga lisod ang paghawan sa mga sidewalk sa national highway kay gahi og ulo ang mga tawo ug dili mopatuo sa mga lagda sa trapiko.
“Wala kay mahimo, gahi og ulo ang mga tawo. Ang mga tawo kuwang sa disiplina,” padayag ni Tomol sa pakighinabi sa Superbalita Cebu kagahapon Sa Presidential Decree 17 kun Revised Philippine Highways Act, hugot gidili ang paggamit sa nasudnong highways alang sa pribadong mga katuyoan.
Sumala ni Tomol mahinungdanon ang papel sa local government unit sa paghimo og political will sa pagpatuman og disiplina sa mga tawo.
Siya niingon ang paghawan sa mga sakyanan, estruktura ug ambulant vendors nga illegal nag-okupar sa national highway pinasikad sa kamandoan ni Presidente Rodrigo Duterte ug DPWH 7 Director Ador Canlas ug pinasubay sa Department Order 73 series of 2014.
Ubos sa maong department order, apil sa gidili sa national roads ang pagtukod og mga edipisyo, balay, payag, tindahan, ug junkshops sa sidewalks; pagbutang og signages, billboards, kural, bungbong, basketball courts, basurahan, poste, towers sa mobile services; pagtugway og mga mananap ug ubang mga kalihokan o estruktura nga makababag sa agianan sa mga tawo o sakyanan.
Si Francis Sanguenza, officer-in-charge for operations sa nibutyag sa operasyon sa Poblacion Ward 2, usa ka awto nga giingong dugay nang gireklamo ang gikuha sa iyang mga sakop kay ilegal nga nagpark sa dapit.
Sa ilang pagpadayon sa Barangay Poblacion Ward I ug Poblacion Ward II, gipapahawa ang 12 ka ambulant vendors nga naa naninda sa sidewalks sa maong mga lugar.
Samtang sa ilang operasyon sa Barangay Tunghaan, dapit sa Sityo Abuno, ilang gisita ang duha ka mga multicab nga nag-park duol sa taytayan sa DPWH.
Matod ni Sanguenza, wala ra nila barguha ang mga tinda.
Siya namahayag nga pabayron og P500 ang mga tag-iya sa nakalapas nga mga sakyanan. Apan, paestoryahon una sila kang Municipal Administrator Concordio Mejias sa dili pa mobayad aron dili na sublion ang ilang gibuhat.
“Dili mi mohunong hangtod among makita nga naa gihapoy namalik nga mo-obstruct sa national highway. Dili pa ni mao, naa pay umaabot,” pasidaan ni Sanguenza.
Si Sanguenza nipasabot nga P500 lang una o kalapasan sa obstruction to traffic ang ilang multa sa mga tag-iya kay nag-ung-ong pa sa committee on laws and ordinances sa Sangguniang Bayan alang sa pag-review ang duha ka ordinansahon nga magpatuman og clamping ug towing ug impounding alang sa mas bug-at nga multa o silot. /