Pabrika sa Mandaue nga milabay sa ilang biya nga bunker oil sa kanal pasakaan og kaso ni Quisumbing

Pasakaan sa kagamhanan sa dakbayan sa Mandaue og kaso ang usa ka kompanya nga naglabay sa ilang ginamit nga lana sa kanal nga niagi sa drainage system sa Barangay Banilad ug Barangay Casuntingan sa dakbayan.

Kini maoy gibutyag ni Mayor Luigi Quisumbing sa iyang facebook post kagahapon.

Matod ni Quisumbing nga sud sa pipila ka adlaw, nakadawat sila og reklamo kalabot sa kabaho sa tubig nga niagi sa kanal sa duha ka barangay.

“Kap. Greg (Yap) of Banilad traced (the) what appeared to be oil coming from the canal and (we have) extracted nearly 20 barrels worth of foul smelling used oil from the canal with the assistance of MCenro. The origin of the oil has been traced and the company that had been dumping it into the drainage system has been fined while City Legal is looking at filing appropriate charges,” matod ni Quisumbing.

Si Aracelli Barlam Mandaue City Environment and Natural Resources Office (Cenro) niingon nga naggikan sa usa ka food company ang baho ug ginamit nga lana nga gilabay sa kanal nga niagi duha ka barangay nga gisawo sa ubos nga bahin sa dapit duol sa usa ka compound.

Ilang nakompirmar ang source sa maong lana niadtong Miyerkules.

Gikatakdang moatubang ang kadagkuan sa kompanya karong adlawa sa Cenro alang sa imbestigasyon maong nagdumili una og bulgar si Barlam sa pangan sa kompanya nga hinungdan niini.

Si Barlam nagkanayon nga pangitaan sa dakbayan og national law nga nalapas ang maong kompanya sanglit gamay ra ang multa ang nalatid sa anti-littering ordinance sa Mandaue nga P5,000.

Dugang niya nga possibleng mag-atubang og kalapasan sa fisheries law ang maong kompanya sanglit ang lana niabot sa dagat ang ilang gilabay nga lana nga gipaagi sa kanal.

GIKAN SA ENVIRONMENT OFFICE SA MANDAUE / ■ KANAL NAGLANALANA: Mao kini ang kanal nga naglanalana tungod sa gilabay nga bunker oil gikan sa usa ka pabrika sa Mandaue.