Daghan ang manambok
Usa ka tawo nakakita og usa ka tambok nga babaye nga nagguyod og iro. Matod pa sa maong tawo, “Oy katambok sa imong baboy.” Nitubag ang babaye sa pag-ingon, “Di man ni baboy, iro man ni, noy.” Sumbalik sa maong tawo, “Ang iro man ang akong gika-estroya, di man ikaw.”
Ato kining nahisgotan gumikan sa usa ka taho nga gibana-bana nga moabot sa 22 porsento, hapit ika-upat, sa mga tawo sa tibuok kalibotan, ang obese kon tambok, 27 ka tuig gikan karon, sa tuig 2045.
Mao kini ang resulta sa usa ka pagtuon basi sa databse sa World Health Organization (WHO) nga gipresentar sa European Congress on Obesity didto sa Vienna, Austria.
Nganong mahinungdanon man ang maong pagtuon? Sumala pa niini, kon modaghan ang mga tawo nga tambok, mosaka sab ang gidaghanon sa mga tawo nga takboyan og diabetes - gikan sa usa sa kada onse ka mga tawo ngadto sa usa sa walo ka mga tawo.
Laing mga balatian nga gilambigit sa pagkatambok mao ang sakit sa kasing-kasing, high blood pressure ug lain-laing klase sa cancer. Apan daghan sab ang mga tawo nga tambok nga baskog ug way sakit.
Apan way statistics nga gihisgotan ang maong pagtuon bahin sa Pilipinas ug dinhi sa Sugbo. Labi na gyud unta sa lalawigan sa Bohol nga kada adlaw ang pista sa buwan sa Mayo. Sa pista ra ba, bida gyud ang humba.
Kon ilhon nga problema sa panglawas ang obesity, mausab na unya ang kinaiya sa mga inahan nga ipahurot og kaon sa bata ang sinukad. Dunay inahan nga niingon sa iyang anak, “Hutda nag kaon kay daghan kaayong mga bata karon nga way gikaon.” Tubag sa anak, “Unya kon ako ning hutdon, mabusog to sila?”
Tingali timailhan kini sa pag-umento ug pag-uswah sa atong ekonomiya. Mas daghan na ang makaon sa katawhan. Nigawas na ang unlimited rice sa mga restaurants.
Pero dunay mga inahan nga masuko kon dakog kaon ilang anak mao nga magduda na lang intawon ang anak. Matod pas sa usa ka anak, “Ma, kon kusog ko mokaon, masuko ka. Kon kusog mokaon ang baboy, malipay ka. Hain man ang tinuod nimong anak, ako o ang baboy?”
Nganong mahinungdanon man ang maong pagtuon? Sumala pa niini, kon modaghan ang mga tawo nga tambok, mosaka sab ang gidaghanon sa mga tawo nga takboyan og diabetes”