Paulo Avelino ‘nilutaw’ sa Kasal
Nakadawat unta ko sa imbitasyon gikan sa GMA 7 Corporate Communications Office sa Manila alang sa press conference sa teleserye nga Inday Will Always Love You niadtong Sabado.
Ang nakaporke kay mao say paglarga nako padulong sa Calubian, Leyte aron pagsugat sa relic ni Sta. Teresita sa Batang Hesus nga niduaw sa ikatulong higayon sa Archdiocesan Shrine of St. Therese sa Brgy. Obispo, Calubian. Nahisgutan ni nako sa niaging semana.
Atong balikan ang Inday Will Always Love You. Nagsugod na kini pagsalida sa Kapuso Network karong semanaha.
Ug ang nakanindot kay halos tanang eksena dinhi sa Cebu gisyut. Usa kini sa mga dagkong hinungdan ngano nga angay kining sundan sa mga taga Cebu ug mga Bisaya.
Gikan sa ilang pagkab-ot sa semi-final slot sa Pilipinas Got Talent, ang Dance Fusion Company All Stars o ang Dancing Fire Warriors mopahigayon sa ilang
Summer Dance Workshop Recital 2018 and Thanksgiving Concert ugma, Sabado.
Wa hinoon koy detalye kon asa pero tungod kay sa Lapulapu City man ang base ning grupoha, seguradong didto sab himoon ang kalihukan.
Sa akong nasulat sa niaging semana, naintriga ko sa bag-ong dalit sa
Star Cinema kay human sa daghang mga pelikula niini nga kalagmitan ulohan sa kanta ang gihimo usab nga ulohan sa pelikula, nagpalahi ang Star Cinema.
Ug imbes taas kaayo ang ulohan, usa ra gyud kini ka pulong ug kana mao ang Kasal. Laing nakapaaghat nako nga motan-aw gyud mao ang mga bida nga sila si Bea Alonzo, Derek Ramsay ug Paulo Avelino.
Nindot ug lahi nga kombinasyon. Ug tuod man, nalingaw ko. Lahi ang istorya ug dunay bahin nga makasorpresa.
Ang sagad makadani nako mao ang mga kagumkom nga mga linya. Tuod man, ubay-ubay ang mga bug-at nga mga gisulti sa mga artista apan ang nakapaagik-ik sa mga tumatan-aw mao kadtong gilitok ni Bea nga hapit na kuno makompleto ang mga letra sa LGBT.
Di katingad-an nga maayo moarte si Bea. Maayo sab si Derek pero nilutaw gyud pag-ayo si Paulo dinhi. An acting vehicle, kon mga tigpaniid sa syobis ang pasulti-on.
Mao nga di katingad-an kon makadaug og award si Paulo tungod ning pelikulaha.