I let you go
Nanghupaw si Ronron. Nakaduko siya, klaro nga di siya makatan-aw og diretso nako. Nakapanglingo ko ug nahikatawa, anang katawa nga dunay kantalita ug pagbiay-biay.
“Mabaw ra kag kalipay, Ronron. Tungod kay wa nimo makuha ang imong gusto nako, gitalikdan ko nimo nga morag putos.”
“Mao nga nia ko ron, Mona, aron mangayog pasaylo nimo. Husto ka. Mabaw ra ang akong rason sa pagbiya nimo. Pero nagbasol na ko. Sa didto na ko sa Davao ug nag-eskuwela na, na-realize nako nga love gyud diay tika.”
Ako na sab ang nanghupaw. Sa akong tan-aw, matinud-anon si Ronron sa pagpangayog pasaylo nako. Dali ra ang pagpasaylo kay di man ko madumtanon nga pagka tawo. Apan wa na ko makaseguro kon love ko pa ba siya. Gawas pa, duna na koy boyfriend.
“Okey, gipasaylo na tika, Ronron. Pero wa ni magpasabot nga nakig-uli na ko nimo. Sa imong pagbiya nako, nahunahuna ko nga di tinud-anay ang imong pagmahal nako. Dali ra kong naka-move on tungod anang hunahunaa. Si Dindo, nagmatinud-anon sa iyang gugma nako. gisugot ko siya.” “Duna na diay kay uyab, Mona.” Mitando ko. Mipahiyom ko. Gipakita ko kang Ronron nga malipayon ko sa among relasyon ni Dindo.
“Pero, nia na man ko, Mona. Wa man ta magbuwag.”
“Wa bitaw.” Dali kong mitubag. Nangyamiid ko. “Pero kon mianhi sab ka nako aron balikon ang atong relasyon, sori gyud. Love nako si Dindo.”
Miduko si Ronron. Nahilom siya. Klaro nga naghunahuna pag-ayo.
“Naay daghang girl, Ronron. Makakita kag labaw pa nako.”
“Dali ra nang isulti, Mona, pero lisod buhaton. Ikaw man ang akong love. Oo, nasayop ko pero karon, wa na koy planong mangitag laing babaye tungod nimo.”
“I’m sorry, Ronron.” Nasuta tingali ni Ronron nga segurado gyud ko sa akong gisulti niya, nananghid na siya nako nga mopauli na. Way tingog nga gitando ko siya.
Nagtuo ko nga di na maghasol ug magsamok si Ronron nako. Apan nasayop diay ko. Nianang pagka sunod adlaw, namisita siya nako. Gabii niadtong tungora. Di man ko bastos nga pagka babaye, gidawat ko sa tinarong si Ronron. Giatubang ko siya sa among sala.
“Abi kog nagkasinabot na ta, Ronron?”
Wa motubag si Ronron. Mitan-aw nuon siya pag-ayo nako. (SUMPAYAN)