Hagit sa bag-ong warden sa CPDRC

Dili nato ikalalis nga pipila ka na kahigayon nga nagilis-ilis og warden ang Cebu Provincial Detention and Rehabilitation Center (CPDRC) nga anaa mahimutang sa Barangay Kalunasan, dakbayan sa Sugbo. Apan labaw pa usab natong di ikalalis nga taliwala sa pagsigig bag-og warden, wa gihapon masulbad kining problema kalabot sa nagpadayon nga pagpayuhot sa gidiling drugas o kontrabando sulod sa maong prisohan.

Sa niaging adlaw, ang Probinsiya sa Sugbo mikuha na usab og laing bag-ong warden nga maoy mopuli sa of icer-incharge nga si Roberto Legaspi.

Ang retiradong hepe sa police nga si Reynaldo Valmoria ang miasumir na sugod kagahapon isip warden.

Lumad siya nga taga Barangay Tisa, dakbayan sa Sugbo apan didto na kini magdako sa Siquijor ug nadestino na og pipila ka mga dapit lakip na niini ang iyang pagka pangulo sa Siquijor Provincial Public Safety Platoon.

Si Valmoria, 57, mahulagway nga adunay igong kasinati-an kon ang panerbisyo sa Philippine National Police (PNP) ang hisgutan tungod sa iyang 32 ka tuig nga eksperiyensiya.

Hinaot iyang magamit ang iyang katakos ug kaantigo sa iyang bag-ong tahas karon ug nga unta dili siya mahisama sa mga nangaging warden nga nahimutang sa negatibong sitwasyon tungod kay nakaon sa salikwaot nga sistema sa pagpadagan sa maong prisohan.

Kon kaniadto nahimong tourist attraction ang CPDRC tungod sa pagkasikat sa dancing inmates, karon sukwahi na ang tanan kay ang paghitak na man hinuon sa mga gidiling drugas maoy nabandilyo sa publiko.

Kini maoy dakong hagit ni Valmoria. Paglimpiyo ug ang pagpabalik sa nagusbat nga pamaagi sa CPDRC.