I let you go

Gusto gyud nako nga di na ko hasulon ni Ronron. Unfair kang Dindo nga kanunay kong dawaton ug atubangon si Ronron sa matag pamisita ani nako.

Boyfriend ko na si Dindo. “Please, Ronron, ayaw na pagsamok nako.”

Gipakita ko ang akong kaseryuso kay medyo nataas ang akong tingog. Naglagot man gud ko.

“Wa ka na ba gyud diay love nako, Mona?”

Nagsigeg tutok si Ronron nako. Nakaduko ko. Naglisod ko pagtubag. Naunsa ba ko, uy, nga mikalit man lang paglubad ang akong gusto? Morag duna pa koy pagbati kang Ronron. Kon wa pa, makatubag unta dayon ko niya.

“Ang imong pagpakahilom, Mona, maoy nagmatuod nga love gihapon ko nimo.”

Mitapad paglingkod si Roron nako. Sa taas nga sopa man ko naglingkod. Mikupot siya sa akong kamot.

“Buwagi si Dindo, Mona. Makasabot ra siya. Wa man ta magkabuwag ba. Puwede tang mag-uli.”

Miginhawa kog lawom gyud kaayo. Hinay kong gikuha ang akong kamot nga gikuptan ni Ronron.

“Sakitan si Dindo ana, Ron.” Miduko na sab ko ug nagduwa-duwa sa akong mga kuko sa kamot. Wa na gyud ko makasabot sa akong gibati niadtong tungora. Tungod lang sa pangutana ni Ronron nako nga wa na ba gyud koy gugma niya, mikalit pagkausab ang dagan sa akong hunahuna.

“Labaw kang sakitan, Mona, kon di mo angkunon sa imong kaugalingon nga love gihapon ko nimo hangtod karon?”

Mikupot na sab si Ronron sa akong kamot. Gipisil niyag hinay. Wa na ko makahimo sa pagkuha sa akong kamot kay sa akong paminaw, gusto kong mabatyagan ang kainit sa palad ni Ronron.

“Tagai kog igong higayon sa paghunahuna ana, Ron.” Nakadesisyon ra gyud ko. “Di ko angay dali-dalion si Dindo.”

“So, mosugot ka na nga mag-uli na ta?”

Mikalit pagsayag ang nawong ni Ronron. Nagmalipayon siya sa akong gisulti.

“Di sab ingon ana, uy, Ron. Kon magkabuwag na mi si Dindo, anha pa ko mosugot nga mag-uli ta.”

Nagsigeg pisil-pisil si Ronron sa akong palad. Gipasagdan ko na lang siya sa iyang gibuhat.

Wa dayon ko makatulog anang gabhiona. Naglisu-liso ko sa akong higdaanan. Sa gisulti ko kang

Ronron, sama ra nga gihatagan ko na siyag paglaom nga makigbalik ko niya.

(SUMPAYAN)